​បាល់ទាត់៖ ​ក្រុម​កំពូល​ទាំងពីរ​នៅ English Premier League, Liverpool និង Manchester City នឹង​ឡើង​ជួបគ្នា​នៅ​វគ្គ​ពាក់កណ្តាល​ផ្តាច់ព្រ័ត្រ​ពានរង្វាន់ FA Cup ក្រោយ​យក​ឈ្នះ​គូប្រកួត​រៀងខ្លួន​យប់មិញ​នេះ​។ ​​ក្រុម​របស់លោក Jurgen Klopp មានឱកាស​គ្រប់គ្រង​បាល់​ច្រើន​លើសលុប និង​មានឱកាស​ជាច្រើន​ដែរ​តែ​មិនមាន​សំណាង រួមជាមួយ​នឹង​រនាំង​ការពារ​ដ៏​រឹងមាំ​របស់​ក្រុម​មកពី​ក្របខណ្ឌ League Championship មួយ​នេះ​។​

​​យ៉ាងណាក្តី ខ្សែប្រយុទ្ធ​ព័រទុយហ្កាល់ Diogo Jota គឺជា​អ្នក​ស៊ុត​បញ្ចូល​ទី​គ្រាប់​ជ័យជំនះ​តែ ១គ្រាប់​គត់​នៅ​នាទី​ទី ៧៨ ឱ្យ Liverpool យកឈ្នះ​នៅ​ទឹកដី Nottingham Forest ១-០​។ ​​សូមបញ្ជាក់ថា នេះ​ជា​បរាជ័យ​ទី២ ប៉ុណ្ណោះ​ក្នុង​ឆ្នាំ ២០២២ នេះ ខណៈដែល​ពួកគេ​កំពុង​ពុះពារ​ដើម្បី​ឱកាស​ឡើងមក English Premier League​។​ ​​លោក Steve Cooper បានមក​ដឹកនាំ Nottingham Forest កាលពី​ខែកញ្ញា​ប៉ុណ្ណោះ​ដោយ​នៅពេលនោះ​ក្រុម​កំពុង​ដុនដាប​នៅ​បាត​តារាង​។ ​​មកដល់ពេលនេះ Nottingham Forest ខ្វះ​តែ​បី​ពិន្ទុ​ទៀត​ប៉ុណ្ណោះ​នឹង​ឈានដល់​តំណែង Play-Off នៅ League Championship ជាមួយនឹង​មួយ​ប្រកួត​នៅសល់​ក្នុង​ដៃ​។

​​ងាក​មក​ទស្សនា​មួយគូ​ទៀត ក្រុម​កំពូល​តារាង Manchester City មិន​លំបាក​ឡើយ​ក្នុងការ​ឈានឡើង​វគ្គ​ពាក់កណ្តាល​ផ្តាច់ព្រ័ត្រ​ក្រោយ​យកឈ្នះ​នៅ​ទឹកដី Southampton ៤-១​។ ​​Raheem Sterling បើក​ការ​នាំមុខ​តាំងពី​នាទី​ទី ១២ តែ​ម្ចាស់ផ្ទះ​តាម​ស្មើ​វិញ​នៅ​ចុង​វគ្គ​ទី ១ ដោយ​គ្រាប់​បាល់​ចូល​ទី​ខ្លួនឯង​របស់ Aymeric Laporte​។ ​​វគ្គ​ទី ២ បី​គ្រាប់​ធ្វើបាន​ដោយ​កីឡាករ​បីនាក់​ផ្សេងគ្នា​រួមមាន Kevin de Bruyne, Phil Foden និង Riyad Mahrez​។ ​ដូច្នេះ​ក្រុម​ឡើង​វគ្គ​ពាក់កណ្តាល​ផ្តាច់ព្រ័ត្រ​រកឃើញ​អស់ហើយ​រួមមាន Liverpool ត្រូវ​ជួប Manchester City និង Chelsea ជួប Crystal Palace​។ ​​ពីរ​ប្រកួត​នេះ​នឹង​ធ្វើឡើង​នៅ​កីឡដ្ឋាន Wembley ទីក្រុង​ដូចគ្នា​នៅ​ថ្ងៃទី១៦ និង ១៧ ខែក្រោយ​៕

​អត្ថបទ​៖​នាង សុភា​វុ​ធ