មនុស្ស ១១ នាក់ ក្នុងនោះមានជំនួយការម្នាក់របស់សមាជិកសភាឆ្វេងនិយមជ្រុលបារាំងម្នាក់ ត្រូវបានចាប់ខ្លួន នៅប្រទេសបារាំងនៅពេលយប់ថ្ងៃអង្គារ និងព្រឹកថ្ងៃពុធ ជុំវិញការសង្ស័យថា មានជាប់ពាក់ព័ន្ធនឹងការសម្លាប់សកម្មជនស្តាំនិយមជ្រុលម្នាក់។

ភ្លាមៗបន្ទាប់ពីការប្រកាសនោះ ទីស្នាក់ការកណ្តាលទីក្រុងប៉ារីសរបស់គណបក្សឆ្វេងនិយមជ្រុល France Unbowed (LFI) បានទទួលការគំរាមកំហែងបំផ្ទុះគ្រាប់បែក ហើយត្រូវបានជម្លៀសចេញ រហូតដល់មានការប្រកាសថា នគរបាលបានធានាសុវត្ថិភាពកន្លែងកើតហេតុ។

សកម្មជនស្តាំនិយមជ្រុល លោក Quentin Deranque អាយុ ២៣ ឆ្នាំ បានស្លាប់ កាលពីថ្ងៃសៅរ៍ បន្ទាប់ពីត្រូវបានវាយដំដោយសកម្មជនឆ្វេងនិយមជ្រុលនៅខាងក្រៅមជ្ឈមណ្ឌលសន្និសីទមួយ ក្នុងទីក្រុងលីយ៉ុង ជាកន្លែងដែលលោកស្រី Rima Hassan សមាជិកគណបក្ស LFI នៃសភាអឺរ៉ុប កំពុងថ្លែងសុន្ទរកថា។

វីដេអូនៃការប្រឈមមុខដាក់គ្នា ត្រូវបានចែករំលែកយ៉ាងទូលំទូលាយនៅលើប្រព័ន្ធផ្សព្វផ្សាយសង្គម។ លោកស្រី Hassan និងសមាជិកផ្សេងទៀតនៃគណបក្ស LFI បានថ្កោលទោសចំពោះការសម្លាប់នេះ។

ការិយាល័យរដ្ឋអាជ្ញាទីក្រុងលីយ៉ុង ដែលបានបើកការស៊ើបអង្កេតលើឃាតកម្មនេះ បាននិយាយថា ជនសង្ស័យចំនួន ១១ នាក់ ត្រូវបានឃាត់ខ្លួនរហូតមកដល់ពេលនេះ។ ក្នុងចំណោមពួកគេមានជំនួយការម្នាក់របស់លោក Raphael Arnault សមាជិកសភានៃគណបក្ស LFI ដែលបាននិយាយកាលពីថ្ងៃអង្គារថា ជំនួយការរូបនេះ បានឈប់ធ្វើការងារនៅសភាហើយ៕