តម្លៃប្រេងបានកើនឡើងក្នុងការជួញដូរនៅអាស៊ី នាថ្ងៃព្រហស្បតិ៍ (១៩ កុម្ភៈ) ខណៈសហរដ្ឋអាមេរិក និងអ៊ីរ៉ង់ បានព្យាយាមបន្ធូរបន្ថយភាពជាប់គាំងក្នុងកិច្ចចរចាលើកម្មវិធីនុយក្លេអ៊ែររបស់ទីក្រុងតេអេរ៉ង់ ប៉ុន្តែភាគីទាំងពីរនៅតែបង្កើនសកម្មភាពយោធានៅក្នុងតំបន់ផលិតប្រេងដ៏សំខាន់ ដែលនាំឱ្យមានក្ដីបារម្ភអំពីលទ្ធភាពនៃជម្លោះផ្ទុះឡើងរវាងទីក្រុងវ៉ាស៊ីនតោន និងទីក្រុងតេអេរ៉ង់។

សន្ទស្សន៍ប្រេងឆៅ Brent បានកើនឡើង ២៤ សេន ឬ ០,៣% ដល់តម្លៃ ៧០,៥៩ ដុល្លារក្នុងមួយបារ៉ែល គិតត្រឹមម៉ោងសកលទៀបភ្លឺថ្ងៃព្រហស្បតិ៍នេះ ខណៈប្រេងឆៅ WTI របស់សហរដ្ឋអាមេរិក បានកើនឡើង ២៨ សេន ឬ ០,៤% ដល់តម្លៃ ៦៥,៤៧ ដុល្លារក្នុងមួយបារ៉ែល។

អ្នកវិភាគរបស់ស្ថាប័ន ANZ បាននិយាយថា ក្តីបារម្ភចម្បងសម្រាប់ទីផ្សារប្រេងគឺថា ភាពតានតឹងដែលផ្ទុះឡើង អាចរំខានការដឹកជញ្ជូនទំនិញក្នុងច្រកសមុទ្រ Hormuz ព្រោះប្រហែល ២០% នៃការប្រើប្រាស់ប្រេងរបស់ពិភពលោក ត្រូវឆ្លងកាត់តាមផ្លូវទឹកនេះ។ អ្នកវិភាគផ្សេងទៀតនិយាយថា ភាពតានតឹងរវាងទីក្រុងវ៉ាស៊ីនតោន និងទីក្រុងតេអេរ៉ង់នៅតែខ្ពស់ ប៉ុន្តែទស្សនៈទូទៅគឺថា ជម្លោះប្រដាប់អាវុធទ្រង់ទ្រាយធំទំនងមិនកើតឡើងទេ ដែលធ្វើឱ្យវិនិយោគិនប្រើវិធីសាស្រ្តរង់ចាំមើលសិន។

យ៉ាងណាក៏ដោយ សហរដ្ឋអាមេរិក បានដាក់ពង្រាយនាវាចម្បាំងជាច្រើនគ្រឿងនៅកៀកនឹងប្រទេសអ៊ីរ៉ង់ ដោយអនុប្រធានាធិបតីសហរដ្ឋអាមេរិក លោក JD Vance បាននិយាយថា ទីក្រុងវ៉ាស៊ីនតោន កំពុងថ្លឹងថ្លែងថាតើត្រូវបន្តការចូលរួមការទូតជាមួយទីក្រុងតេអេរ៉ង់ ឬបន្ត «ជម្រើសមួយផ្សេងទៀត»៕