អតីតប្រធានាធិបតីកូរ៉េខាងត្បូង លោក Yoon Suk Yeol ត្រូវបានកាត់ទោសឲ្យជាប់ពន្ធនាគារអស់មួយជីវិត នៅថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) នេះ បន្ទាប់ពីត្រូវបានរកឃើញថា មានទោសពីបទដឹកនាំការបះបោរ ក្នុងអំឡុងពេលលោកប្រកាសច្បាប់អាជ្ញាសឹក កាលពីខែធ្នូ ឆ្នាំ២០២៤។

យ៉ាងណាក្ដី សេចក្តីសម្រេចនេះ ដែលប្រកាសដោយចៅក្រមតុលាការតំបន់កណ្តាលទីក្រុងសេអ៊ូល លោក Jee Kui-youn គឺស្រាលជាងទោសប្រហារជីវិតដែលរដ្ឋអាជ្ញាបានស្វែងរកនៅឯសវនាការចុងក្រោយនៃដំណើរការកាត់ទោសកាលពីខែមករា។

លោក Jee បានលើកឡើងនៅក្នុងសាលក្រមនេះថា លោក Yoon មានទោសពីបទដឹកនាំការបះបោរ និងបានប្រព្រឹត្តអំពើ ដែលបំផ្លាញសណ្តាប់ធ្នាប់រដ្ឋធម្មនុញ្ញរបស់ប្រទេស។

គួរបញ្ជាក់ថា ការកាត់ទោសនេះធ្វើឡើងបន្ទាប់ពីមានសេចក្តីសម្រេចដាច់ដោយឡែកមួយនៅថ្ងៃទី១៦ ខែមករា នៅពេលដែលលោក Yoon ត្រូវបានកាត់ទោសឲ្យជាប់ពន្ធនាគាររយៈពេល ៥ឆ្នាំ ពីបទប៉ុនប៉ងរារាំងការអនុវត្តដំណើរការចាប់ខ្លួនលោក បន្ទាប់ពីរូបលោកត្រូវបានចោទប្រកាន់ទម្លាក់តំណែង និងព្យួរតំណែង។ លោក Yoon គឺជាប្រធានាធិបតីកូរ៉េខាងត្បូងដំបូងគេក្នុងតំណែង ដែលត្រូវបានចាប់ខ្លួននៅក្នុងប្រតិបត្តិការមួយដែលមានបុគ្គលិកនគរបាលជាង ៣.០០០នាក់ ដែលពាក់ព័ន្ធនឹងការប្រឈមមុខដាក់គ្នាជាមួយភ្នាក់ងារសន្តិសុខប្រធានាធិបតី។

ក្រៅពីលោក Yoon មន្ត្រីជាន់ខ្ពស់ផ្សេងទៀតក៏ត្រូវបានកាត់ទោសពីបទប៉ុនប៉ងជ្រោមជ្រែងច្បាប់អាជ្ញាសឹកដែលមិនជោគជ័យនេះដែរ។ អតីតនាយករដ្ឋមន្ត្រី លោក Han Duck-soo ត្រូវបានកាត់ទោសឲ្យជាប់ពន្ធនាគាររយៈពេល ២៣ឆ្នាំ ខណៈអតីតរដ្ឋមន្ត្រីក្រសួងមហាផ្ទៃ លោក Lee Sang-min បានទទួលទោស ៧ឆ្នាំ៕