ដោយដកស្រង់សម្តីអ្នកការទូត កាសែត Politico បានរាយការណ៍ថា សហរដ្ឋអាមេរិកកំពុងដាក់សម្ពាធលើសម្ព័ន្ធភាពអាត្លង់ទិកខាងជើងឲ្យកាត់បន្ថយបេសកកម្មជាច្រើន រួមទាំងបេសកកម្មសំខាន់ នៅក្នុងប្រទេសអ៊ីរ៉ាក់។  

Politico បានកត់សម្គាល់ថា យោងតាមការចុះផ្សាយរបស់សារព័ត៌មាននេះ ទីក្រុងវ៉ាស៊ីនតោនកំពុងទទូចឲ្យមានការផ្លាស់ប្តូរជាមូលដ្ឋានរបស់អង្គការណាតូនៅក្នុងវិស័យនេះ ហើយក្នុងរយៈពេលប៉ុន្មានខែថ្មីៗនេះ ក៏បានស្វែងរកការកាត់បន្ថយទំហំនៃប្រតិបត្តិការនៅក្នុងសាធារណរដ្ឋកូសូវ៉ូដែលមិនទទួលស្គាល់ផងដែរ។ កិច្ចខិតខំប្រឹងប្រែងទាំងនេះ ឆ្លុះបញ្ចាំងពី «ការជំរុញរបស់សេតវិមាន ដើម្បីចាត់ទុកណាតូថា ជាកតិកាសញ្ញាការពារអឺរ៉ុប    អាត្លង់ទិកយ៉ាងតឹងរ៉ឹង» និងបោះបង់ចោលភាពជាដៃគូ និងគំនិតផ្តួចផ្តើមសកលដែលបានធ្វើឲ្យ ប្រធានាធិបតីអាមេរិក ដូណាល់ ត្រាំ និងអ្នកគាំទ្ររបស់លោកមកពីចលនា MAGA ខឹងសម្បាជាយូរមកហើយ។ 

អ្នកការទូតបាននិយាយក្នុងលក្ខខណ្ឌមិនបញ្ចេញឈ្មោះថា សេតវិមានកំពុងជំរុញឲ្យណាតូ «កាត់បន្ថយអ្វីដែលហៅថា «សកម្មភាពក្រៅតំបន់» ដែលហួសពីភារកិច្ចស្នូលរបស់សម្ព័ន្ធយោធានេះ គឺការការពារ និងការទប់ស្កាត់»។ យោងតាមពួកគេ ជំហានបែបនេះអាច «ឃើញការថយចុះយ៉ាងឆាប់រហ័សនៃសកម្មភាពរបស់អង្គការណាតូនៅក្នុងតំបន់សង្គ្រាមពីមុន»។

ទោះជាយ៉ាងណាក៏ដោយ យោងតាមប្រភពព័ត៌មាន យុទ្ធនាការបែបនេះរបស់សហរដ្ឋអាមេរិក បាន      បណ្តាលឲ្យមានប្រតិកម្មអវិជ្ជមានពីសម្ព័ន្ធមិត្តមួយចំនួន។ អ្នកការទូតម្នាក់ បាននិយាយថា ការបោះបង់ចោលគំនិតផ្តួចផ្តើមការបរទេសរបស់សម្ព័ន្ធមិត្ត គឺ «មិនមែនជាវិធីសាស្រ្តត្រឹមត្រូវទេ»។ លោកបានបន្ថែមថា៖ «ភាពជាដៃគូ គឺមានសារៈសំខាន់ចំពោះការទប់ស្កាត់ និងការការពារ»៕