ប្រធានាធិបតីអាមេរិក លោក Donald Trump នៅថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) នេះ បានជួបជុំសម្ព័ន្ធមិត្ត ដើម្បីចាប់ផ្ដើមចេញដំណើរជាផ្លូវការនូវក្រុមប្រឹក្សាសន្តិភាព (Board of Peace) ជាស្ថាប័នថ្មីរបស់លោកដែលផ្តោតលើវឌ្ឍនភាព នៅតំបន់ហ្កាហ្សា ប៉ុន្តែមហិច្ឆតារបស់ក្រុមមិនមែនត្រឹមតែប៉ុណ្ណឹងនោះទេ។

មេដឹកនាំពិភពលោកប្រហែលជាង ២០នាក់ ឬមន្ត្រីជាន់ខ្ពស់ផ្សេងទៀត បានទៅដល់ទីក្រុងវ៉ាស៊ីនតោនសម្រាប់កិច្ចប្រជុំនេះ ក្នុងនោះរួមទាំងមិត្តភក្តិដែលលម្អៀងទៅរកអំណាចផ្តាច់ការរបស់លោក Trump ផងដែរ ហើយស្ទើរតែគ្មានអ្នកប្រជាធិបតេយ្យអឺរ៉ុបណាម្នាក់ឡើយ ដែលតាមប្រពៃណីតែងចុះហត្ថលេខាលើគំនិតផ្តួចផ្តើមរបស់សហរដ្ឋអាមេរិក។

ក្រុមប្រឹក្សាសន្តិភាព (Board of Peace) បានជួបជុំគ្នា បន្ទាប់ពីរដ្ឋបាលរបស់លោក Trump ដែលសហការជាមួយប្រទេសកាតា និងអេហ្ស៊ីប បានចរចាឲ្យមានបទឈប់បាញ់ ក្នុងខែតុលាឆ្នាំមុន ដើម្បីបញ្ឈប់សង្គ្រាមបំផ្លិចបំផ្លាញរយៈពេល ២ឆ្នាំ នៅតំបន់ហ្កាហ្សា។

សហរដ្ឋអាមេរិក លើកឡើងថា ផែនការនេះ ឥឡូវនេះបានចូលដល់ដំណាក់កាលទី២ របស់ខ្លួន ដោយផ្តោតលើការរំសាយអាវុធពីក្រុមហាម៉ាស ជាក្រុមសកម្មប្រយុទ្ធប៉ាឡេស្ទីន ដែលការវាយប្រហារមិនធ្លាប់មានពីមុនរបស់ខ្លួន កាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល បានបង្កឲ្យមានការវាយលុកដ៏ធំសងសឹកវិញ។

នៅក្នុងកិច្ចប្រជុំក្រុមប្រឹក្សាសន្តិភាព លោក Trump ត្រូវបានគេរំពឹងថា នឹងរៀបរាប់លម្អិតអំពីការសន្យាផ្តល់ជំនួយជាង ៥ពាន់លានដុល្លារអាមេរិក សម្រាប់តំបន់ហ្កាហ្សា ជាកន្លែងដែលអគារភាគច្រើន ត្រូវបានបំផ្លាញឲ្យទៅជាគំនរបាក់បែក ហើយលោកមហាសេដ្ឋីអចលនទ្រព្យដែលបានក្លាយជាប្រធានាធិបតីរូបនេះ បានលើកឡើងពីការអភិវឌ្ឍរមណីយដ្ឋានដ៏គួរឲ្យភ្ញាក់ផ្អើល។

ជាមួយគ្នានេះ កិច្ចប្រជុំនេះក៏នឹងពិនិត្យមើលផងដែរពីរបៀបដាក់ឲ្យដំណើរការកងកម្លាំងស្ថិរភាពអន្តរជាតិ ដែលនឹងធានាសន្តិសុខនៅក្នុងតំបន់ហ្កាហ្សា៕