វីដេអូ ដែលបានចេញផ្សាយដោយយោធាប្រទេសស៊ុយអែត បានបង្ហាញពីកងពលទ័ពអាកាសរបស់ប្រទេសកំពុងហ្វឹកហាត់នៅដែនដីហ្គ្រីនលែន ជាផ្នែកមួយនៃសមយុទ្ធ «Arctic Endurance» ដែលកំពុងដំណើរការ។ វីដេអូដែលយោធាបានចុះកាលបរិច្ឆេទ បានបង្ហាញពីទាហានស៊ុយអែតនៅភាគខាងលិចដែនដីហ្គ្រីនលែន ដើរក្នុងក្បួនជាមួយកាបូប និងអាវុធ ដោយបាញ់កាំភ្លើងក្នុងវង់នៃទីលានមួយ ហើយសមាជិកម្នាក់របស់អង្គភាព កំពុងប្រើប្រាស់យានដ្រូន។

យោធាស៊ុយអែតបាននិយាយនៅក្នុងសេចក្តីថ្លែងការណ៍ថា ក្រុមកងទ័ពអាកាស នឹងហ្វឹកហាត់ក្នុងសមយុទ្ធនេះរយៈពេល «ពីរសប្តាហ៍» ។ សមយុទ្ធ «Arctic Endurance» ត្រូវបានចាប់ផ្តើមដោយប្រទេសដាណឺម៉ាក ហើយវាជាផ្នែកមួយនៃបេសកកម្ម «ឆ្មាំអាកទិក ឬ Arctic Sentry» ដែលត្រូវបានប្រកាសដោយអង្គការណាតូ ដើម្បីពង្រឹងវត្តមានរបស់ខ្លួននៅក្នុងតំបន់អាកទិក ជាផ្នែកមួយនៃកិច្ចខិតខំប្រឹងប្រែងដើម្បីបន្ធូរបន្ថយភាពតានតឹងធ្ងន់ធ្ងរនៅក្នុងក្រុមសម្ព័ន្ធមិត្ត ដែលត្រូវបានជំរុញដោយប្រធានាធិបតីសហរដ្ឋអាមេរិក លោក Donald Trump ឲ្យសហរដ្ឋអាមេរិកទិញយកដែនដីហ្គ្រីនលែនមកគ្រប់គ្រង។

ទីបញ្ជាការកណ្តាលយោធារបស់សម្ព័ន្ធមិត្ត បាននិយាយនៅក្នុងសេចក្តីថ្លែងការណ៍ថា បេសកកម្ម «ឆ្មាំអាកទិក ឬ Arctic Sentry» នឹងសម្របសម្រួលវត្តមានយោធាកាន់តែច្រើនរបស់សម្ព័ន្ធមិត្តណាតូនៅក្នុងតំបន់ រួមទាំងសមយុទ្ធដូចជា Arctic Endurance របស់ប្រទេសដាណឺម៉ាក នៅតំបន់ហ្គ្រីនលែន។ 

អង្គការណាតូ មិនបានកំណត់ចំនួនកងទ័ព ឬបញ្ជាក់ពីប្រភេទយុទ្ធោបករណ៍អ្វីខ្លះដែលនឹងចូលរួមក្នុងបេសកកម្មនេះទេ។