មន្ត្រីជាន់ខ្ពស់របស់អង្គការសហប្រជាជាតិ (UN) មួយរូប កាលពីថ្ងៃពុធ (ទី១៨ ខែកុម្ភៈ ឆ្នាំ២០២៦) បានព្រមានថា បទឈប់បាញ់ដ៏ផុយស្រួយ នៅតំបន់ហ្កាហ្សា នៅតែស្ថិតនៅក្រោមការគំរាមកំហែង ខណៈដែលការវាយប្រហាររបស់អ៊ីស្រាអែល និងវិធានការជាឯកតោភាគីរបស់អ៊ីស្រាអែល នៅតំបន់កាន់កាប់ West Bank បានធ្វើឲ្យភាពតានតឹងកាន់តែកើនឡើង និងផ្ដល់ភាពឈឺចាប់ដល់ជនជាតិប៉ាឡេស្ទីនកាន់តែខ្លាំងឡើងៗ។

អគ្គលេខាធិការរង UN ទទួលបន្ទុកកិច្ចការនយោបាយ និងការកសាងសន្តិភាព គឺលោកស្រី Rosemary DiCarlo បានលើកឡើងក្នុងអំឡុងពេលសម័យប្រជុំកម្រិតខ្ពស់របស់ក្រុមប្រឹក្សាសន្តិសុខថា៖ «ក្នុងរយៈពេលប៉ុន្មានសប្តាហ៍ថ្មីៗនេះ យោធាអ៊ីស្រាអែលបានបង្កើនការវាយប្រហារ នៅទូទាំងតំបន់ហ្កាហ្សា ដោយវាយប្រហារតំបន់ដែលមានប្រជាជនរស់នៅច្រើន និងសម្លាប់ប្រជាជនប៉ាឡេស្ទីនរាប់សិបនាក់»។ ហើយលោកស្រីបានសង្កត់ធ្ងន់ថា៖ «តំបន់ហ្កាហ្សាមិនទាន់មានសន្តិភាពនៅឡើយទេ»។ 

ដោយបានពណ៌នាអំពីពេលវេលានេះថា ជា «ដំណាក់កាលសំខាន់ខ្លាំង» លោកស្រី DiCarlo បាននិយាយថា «បន្ទាប់ពីមាននូវជម្លោះដ៏បំផ្លិចបំផ្លាញ និងទុក្ខវេទនាដ៏ក្រៃលែងរបស់មនុស្ស ក្នុងរយៈពេលជាច្រើនឆ្នាំ ឱកាសមួយបានប្រាកដឡើង ដែលអាចឲ្យតំបន់នេះឆ្ពោះទៅកាន់ទិសដៅផ្សេង។ ប៉ុន្តែឱកាសនោះមិនត្រូវបានធានា ឬមានភាពអចិន្ត្រៃយ៍ឡើយ»។ លោកស្រីបានអំពាវនាវឲ្យមានវិធានការបន្ទាន់ ដើម្បីពង្រឹងបទឈប់បាញ់ និងជំរុញលំហូរជំនួយមនុស្សធម៌។

ជាមួយគ្នានេះ ដោយគូសបញ្ជាក់ពីកិច្ចប្រជុំក្រុមប្រឹក្សាសន្តិភាព (Board of Peace) នៅទីក្រុងវ៉ាស៊ីនតោនឌីស៊ី លោកស្រីបាននិយាយថា វាគឺជា «ជំហានដ៏សំខាន់មួយ» សម្រាប់ការអនុវត្តដំណាក់កាលទី២ នៃបទឈប់បាញ់ និងជំរុញផ្លូវនយោបាយឆ្ពោះទៅរកដំណោះស្រាយរដ្ឋ២។ 

លោកស្រីបានថ្កោលទោសបន្ថែមទៀត ចំពោះចំណាត់ការរបស់អ៊ីស្រាអែល នៅតំបន់កាន់កាប់ West Bank ដោយបានបញ្ជាក់ថា «កងកម្លាំងអ៊ីស្រាអែលបានបន្តប្រតិបត្តិការទ្រង់ទ្រាយធំ នៅទូទាំងតំបន់នេះ ដែលជារឿយៗពាក់ព័ន្ធការបាញ់ប្រហារដោយផ្ទាល់ និងធ្វើឲ្យមានក្ដីបារម្ភយ៉ាងខ្លាំង អំពីការប្រើប្រាស់កម្លាំងបង្កគ្រោះថ្នាក់ដល់ជីវិត»។ 

លោកស្រីបានបន្ថែមថា៖ «យើងកំពុងឃើញការបញ្ចូលជាដែនដីឧបសម្ព័ន្ធនូវតំបន់ West Bank បន្តិចម្តង ៗ ខណៈដែលវិធានការជាឯកតោភាគីរបស់អ៊ីស្រាអែល បានផ្លាស់ប្តូរស្ថានភាពជាបន្តបន្ទាប់»៕