អ្នកសារព័ត៌មានប៉ាឡេស្ទីនដែលត្រូវបានដាក់ពន្ធនាគារដោយអ៊ីស្រាអែល បាននិយាយរៀបរាប់លម្អិតពីការបំពានដ៏ឃោឃៅ អំឡុងពេលជាប់ឃុំ រួមទាំងការវាយដុំជាប្រចាំ ការបង្អត់អាហារ និងការចាប់រំលោភសេពសន្ថវៈ ។ នេះបើយោងតាមសក្ខីកម្មចុះផ្សាយដោយគណៈកម្មាធិការការពារអ្នកកាសែតអន្តរជាតិ(CPJ) ។

នៅក្នុងសេចក្តីរាយការណ៍ថ្ងៃទី ១៩ ខែកុម្ភៈ ក្រុមសិទ្ធិសារព័ត៌មានមួយនេះ និយាយថា ពួកគេបានធ្វើបទសម្ភាសន៍ជាមួយអ្នកកាសែតប៉ាឡេស្ទីន ៥៩នាក់ ដែលត្រូវបានដាក់ពន្ធនាគារដោយអ៊ីស្រាអែល បន្ទាប់ពីការវាយប្រហារដឹកនាំដោយក្រុមហាម៉ាសកាលពីខែតុលា ឆ្នាំ ២០២៣ ។ ពួកគេទាំងអស់គ្នាលើកលែងតែម្នាក់គត់ រាយការណ៍ពីការធ្វើទារុណកម្ម ការបំពានផ្លូវភេទ ឬអំពើហិង្សាផ្សេងទៀត ។

សេចក្តីរាយការណ៍បន្តថា ការបំពានចោទប្រកាន់ទាំងនេះ មានទាំងការវាយនឹងដំបងឆក់ និងឆក់ខ្សែភ្លើង រហូតដល់ការដាក់ឲ្យនៅក្នុងទឹកស្អុយ ក៏ដូចជាអំពើហិង្សាផ្លូវភេទ ។ អ្នកកាសែត ២នាក់ និយាយថា ពួកនាងត្រូវបានចាប់រំលោភសេពសន្ថវៈដោយឆ្មាំគុកអ៊ីស្រាអែល ។ 

អ្នកកាសែត Sami al-Sai និយាយថា ទាហានអ៊ីស្រាអែលបានដោះអាវគាត់ចេញ និងវាយដុំគាត់នឹងដំបូងនៅក្នុងបន្ទប់គុកតូចមួយស្ថិតក្នុងពន្ធនាគារ Megiddoរបស់អ៊ីស្រាអែល ៕