ចៅក្រមសហព័ន្ធមួយរូប កាលពីថ្ងៃពុធ (ទី១៨ ខែកុម្ភៈ ឆ្នាំ២០២៦) បានច្រានចោលសេចក្តីសម្រេចរបស់ក្រុមប្រឹក្សារដ្ឋបាលដែលគាំទ្រគោលនយោបាយរបស់រដ្ឋបាលលោកប្រធានាធិបតីអាមេរិក Donald Trump ក្នុងការដាក់មនុស្សរាប់ពាន់នាក់ដែលត្រូវបានចាប់ខ្លួនក្នុងអំឡុងពេលមានការបង្ក្រាបអន្តោប្រវេសន៍ ឲ្យស្ថិតក្នុងការឃុំខ្លួនជាកាតព្វកិច្ច ដោយមិនមានឱកាសមានសេរីភាព តាមរយៈការបង់ប្រាក់ធានាឡើយ។

ចៅក្រមសហព័ន្ធសហរដ្ឋអាមេរិក លោកស្រី Sunshine Sykes នៅទីក្រុង Riverside រដ្ឋ California បានបដិសេធសេចក្តីសម្រេចរបស់ក្រុមប្រឹក្សាភិបាលបណ្តឹងឧទ្ធរណ៍អន្តោប្រវេសន៍ បន្ទាប់ពីបានរកឃើញថា រដ្ឋបាលនេះមិនបានអនុវត្តតាមបទបញ្ជាមុនរបស់លោកស្រី ដែលប្រកាសថា គោលនយោបាយមូលដ្ឋាន គឺខុសច្បាប់។

លោកស្រីចៅក្រម Sykes ដែលត្រូវបានតែងតាំងដោយអតីតប្រធានាធិបតីខាងគណបក្សប្រជាធិបតេយ្យ គឺលោក Joe Biden បានហៅវិធានការរបស់រដ្ឋបាលនេះថា «គ្មានភាពអៀនខ្មាស» ហើយបានចោទប្រកាន់ថា កំពុងព្យាយាម «បន្តយុទ្ធនាការវិធានការខុសច្បាប់របស់ខ្លួន» ដោយនៅតែបដិសេធមិនមានសវនាការបង់ប្រាក់ធានាខ្លួន សូម្បីតែបន្ទាប់ពីមានសេចក្តីសម្រេចរបស់លោកស្រី។

ចៅក្រមសហព័ន្ធរូបនេះ បានសរសេរថា៖ «អ្នកឆ្លើយតបបានធ្វើហួសពីដែនកំណត់នៃការអនុវត្តតាមរដ្ឋធម្មនុញ្ញ»។ 

ពាក់ព័ន្ធនឹងសេចក្ដីសម្រេចនេះ ក្រសួងសន្តិសុខមាតុភូមិសហរដ្ឋអាមេរិក (DHS) និងក្រសួងយុត្តិធម៌សហរដ្ឋអាមេរិក ដែលត្រួតពិនិត្យក្រុមប្រឹក្សាភិបាល មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

ក្រោមច្បាប់អន្តោប្រវេសន៍សហព័ន្ធ «អ្នកដាក់ពាក្យស្នើសុំចូល» សហរដ្ឋអាមេរិក ត្រូវប្រឈមនឹងការឃុំខ្លួនជាកាតព្វកិច្ច ខណៈពេលដែលករណីរបស់ពួកគេ កំពុងដំណើរការនៅក្នុងតុលាការអន្តោប្រវេសន៍ ហើយមិនមានសិទ្ធិទទួលបានសវនាការធានាខ្លួនឡើយ៕