អតីតប្រធានាធិបតីហ្វីលីពីន លោក Rodrigo Duterte បានលះបង់សិទ្ធិរបស់លោក ក្នុងការបង្ហាញខ្លួន ពោលគឺមិនថា ទាំងផ្ទាល់ ឬតាមវីដេអូ នៅចំពោះមុខតុលាការព្រហ្មទណ្ឌអន្តរជាតិ (ICC) នាសប្តាហ៍ក្រោយ ខណៈដែលលោកបដិសេធមិនទទួលស្គាល់យុត្តាធិការដែលអនុវត្តចំពោះរូបលោក ដោយតុលាការមានមូលដ្ឋាននៅទីក្រុងឡាអេ ប្រទេសហូឡង់។

មេធាវីរបស់លោក គឺលោក Nicholas Kaufman នៅក្នុងឯកសារ ៦ទំព័រចុះនៅថ្ងៃទី១៨ ខែកុម្ភៈ បានបញ្ជូនទៅកាន់ការិយាល័យចៅក្រមមុនការជំនុំជម្រះរបស់តុលាការ នូវសំណេរលាយលក្ខណ៍អក្សររបស់លោក Duterte អំពីការសម្រេចចិត្តរបស់លោក ក្នុងការមិនចូលរួមសវនាការបញ្ជាក់ការចោទប្រកាន់ នៅទីក្រុងឡាអេ នាថ្ងៃទី២៣ ខែកុម្ភៈ។

លិខិតដែលចុះហត្ថលេខាដោយអតីតប្រធានាធិបតីរូបនេះ បានរៀបរាប់ថា៖ «ខ្ញុំ Rodrigo Roa Duterte មានបំណងលះបង់សិទ្ធិរបស់ខ្ញុំ ក្នុងការចូលរួមសវនាការ ស្ដីពីការបញ្ជាក់ការចោទប្រកាន់ដែលបច្ចុប្បន្ន ត្រូវបានកំណត់នៅថ្ងៃទី ២៣-២៧ ខែកុម្ភៈ ឆ្នាំ២០២៦។ ខ្ញុំដឹងពីផលវិបាកនៃការលះបង់សិទ្ធិរបស់ខ្ញុំនេះ ដែលត្រូវបានពន្យល់យ៉ាងល្អិតល្អន់ដល់ខ្ញុំដោយក្រុមអ្នកការពារក្ដីរបស់ខ្ញុំ ហើយខ្ញុំទុកចិត្តលើគាត់ និងក្រុមរបស់គាត់ ក្នុងការទៅជំទាស់តវ៉ានឹងការមានភស្តុតាងមិនគ្រប់គ្រាន់របស់អយ្យការ តំណាងឲ្យរូបខ្ញុំ»។

តាមរយៈលិខិតនោះ លោកបានបន្តថា៖ «ខ្ញុំមិនចង់ចួលរួមដំណើរការទាំងនេះពីខាងក្រៅបន្ទប់សវនាការ ដោយការប្រើប្រាស់បច្ចេកវិទ្យាទំនាក់ទំនងនោះឡើយ។ ច្បាប់ចម្លងដើមនៃការបោះបង់សិទ្ធិនេះ និងហត្ថលេខារបស់ខ្ញុំ ស្ថិតនៅក្នុងដៃមេធាវីរបស់ខ្ញុំ»។

លោក Duterte បានសង្កត់ធ្ងន់ថា គ្មានហេតុផលណាមួយ ដើម្បីឲ្យរូបលោកចូលរួមសវនាការនេះនោះទេ ខណៈដែលលោកបានអះអាងថា ICC គ្មានយុត្តាធិការលើសំណុំរឿងរបស់លោកឡើយ ហើយថា លោកគ្រាន់តែត្រូវបាន «ចាប់ជំរិត» នៅពេលដែលលោកត្រូវបានចាប់ខ្លួន កាលពីថ្ងៃទី១១ ខែមីនា ឆ្នាំ២០២៥។

គួរបញ្ជាក់ថា លោក Duterte ត្រូវបានឃុំខ្លួននៅក្នុងពន្ធនាគារហូឡង់ ក្នុងតំបន់ Scheveningen ខណៈដែលរូបលោកប្រឈមនឹងបទចោទឃាតកម្ម ៣ករណី ដោយត្រូវបានចោទប្រកាន់ថា ជា «អ្នករួមគំនិតដោយប្រយោល» ក្នុង «ផែនការរួម» ដើម្បីកំណត់គោលដៅជនសង្ស័យគ្រឿងញៀន ដែលរាប់ពាន់នាក់ត្រូវបានសម្លាប់យ៉ាងឃោរឃៅ៕