ប្រធានថាមពលបរមាណូអ៊ីរ៉ង់ លោក Mohammad Eslami បាននិយាយថា គ្មានប្រទេសណា អាចដកហូតសិទ្ធិរបស់ខ្លួន ក្នុងការចម្រាញ់នុយក្លេអ៊ែរបាននោះទេ បន្ទាប់ពីប្រធានាធិបតីអាមេរិកលោក Donald Trump បានបង្ហើបម្តងទៀត អំពីវិធានការយោធា ក្រោយការចរចានៅទីក្រុងហ្សឺណែវ ប្រទេសស្វីស។

បើយោងតាមវីដេអូដែលបានចេញផ្សាយដោយសារព័ត៌មាន Etemad នៅថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) នេះ លោក Eslami បាននិយាយថា៖ «មូលដ្ឋានគ្រឹះនៃឧស្សាហកម្មនុយក្លេអ៊ែរ គឺការចម្រាញ់។ អ្វីក៏ដោយដែលអ្នកចង់ធ្វើនៅក្នុងដំណើរការនុយក្លេអ៊ែរ អ្នកត្រូវការឥន្ធនៈនុយក្លេអ៊ែរ»។

លោកបានបន្ថែមថា៖ «កម្មវិធីនុយក្លេអ៊ែររបស់អ៊ីរ៉ង់ កំពុងដំណើរការស្របតាមច្បាប់របស់ទីភ្នាក់ងារថាមពលបរមាណូអន្តរជាតិ (IAEA) ហើយគ្មានប្រទេសណាអាចដកហូតសិទ្ធិអ៊ីរ៉ង់ ក្នុងការទទួលបានអត្ថប្រយោជន៍ដោយសន្តិវិធីពីបច្ចេកវិទ្យានេះទេ»។

ការអត្ថាធិប្បាយនេះធ្វើឡើងបន្ទាប់ពីបញ្ចប់កិច្ចចរចាជុំទី ២ ដែលសម្របសម្រួលដោយប្រទេសអូម៉ង់ រវាងទីក្រុងតេអេរ៉ង់ និងវ៉ាស៊ីនតោន នៅទីក្រុងហ្សឺណែវ កាលពីថ្ងៃទី១៧ ខែកុម្ភៈ។ គូអរិទាំង២ បានធ្វើកិច្ចពិភាក្សាជុំដំបូងនៅថ្ងៃទី៦ ខែកុម្ភៈ នៅអូម៉ង់ ដែលជាលើកទី១ គិតចាប់តាំងពីកិច្ចចរចាពីមុន បានដួលរលំក្នុងអំឡុងសង្គ្រាមអ៊ីរ៉ង់-អ៊ីស្រាអែលរយៈពេល ១២ថ្ងៃ ក្នុងខែមិថុនា ឆ្នាំ២០២៥។

សហរដ្ឋអាមេរិកបានចូលរួមសង្គ្រាមមួយរយៈពេលខ្លីជាមួយអ៊ីស្រាអែល ដោយវាយប្រហាររោងចក្រនុយក្លេអ៊ែរអ៊ីរ៉ង់។ ហើយនៅថ្ងៃទី១៨ ខែកុម្ភៈ លោក Trump បានលើកឡើងជាថ្មីម្តងទៀតថា សហរដ្ឋអាមេរិកអាចនឹងវាយប្រហារអ៊ីរ៉ង់ អំឡុងការបង្ហោះសារ នៅលើគេហទំព័របណ្ដាញសង្គម Truth Social របស់លោក៕