នៅថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) នេះ ព្រះអនុជរបស់ព្រះមហាក្សត្រ Charles គឺព្រះអង្គម្ចាស់ Andrew Mountbatten-Windsor ត្រូវបានចាប់ខ្លួនពីបទសង្ស័យថា បានប្រព្រឹត្តខុសក្នុងមុខតំណែងសាធារណៈ ជុំវិញការចោទប្រកាន់ ដែលថា ទ្រង់បានផ្ញើឯកសារសម្ងាត់របស់រដ្ឋាភិបាលទៅឲ្យលោក Jeffrey Epstein។ នេះបើយោងតាមសេចក្ដីរាយការណ៍របស់ប្រព័ន្ធផ្សព្វផ្សាយ BBC។

នគរបាលតំបន់ Thames Valley បានឲ្យដឹងនៅដើមខែនេះថា មន្ត្រីនគរបាលកំពុងពិចារណាការចោទប្រកាន់ ដែលថា ទ្រង់ Mountbatten-Windsor ដែលត្រូវបានដកហូតព្រះឋានៈជារាជវង្សហើយនោះ បានប្រគល់ឯកសារទៅឲ្យជនល្មើសដែលត្រូវបានផ្ដន្ទាទោស ក្នុងសំណុំរឿងផ្លូវភេទ។ នេះបើយោងតាមឯកសារដែលចេញផ្សាយដោយរដ្ឋាភិបាលសហរដ្ឋអាមេរិក។

កងកម្លាំងបានឲ្យដឹងនៅក្នុងសេចក្តីថ្លែងការណ៍មួយនៅលើបណ្ដាញសង្គម X ថា៖ «នគរបាលតំបន់ Thames Valley បានបើកការស៊ើបអង្កេតលើបទល្មើសប្រព្រឹត្តខុសក្នុងមុខតំណែងសាធារណៈ។ បុគ្គលម្នាក់ភេទប្រុសដែលមានអាយុជាង ៦០ឆ្នាំ មកពីតំបន់ Norfolk ត្រូវបានចាប់ខ្លួន ហើយនៅតែស្ថិតក្នុងការឃុំឃាំងរបស់នគរបាល។ យោងតាមការណែនាំជាតិ យើងនឹងមិនបញ្ចេញឈ្មោះបុគ្គលដែលត្រូវបានចាប់ខ្លួននេះឡើយ»។

អតីតព្រះអង្គម្ចាស់អង្គនេះ ដែលជាបុត្រាទី២ របស់នៃព្រះសពម្ចាស់ក្សត្រីយ៍ Elizabeth តែងតែបដិសេធមិនបានប្រព្រឹត្តអ្វីខុសឡើយ ទាក់ទងនឹងលោក Epstein ដែលបានស្លាប់ហើយនោះ ហើយបាននិយាយថា សោកស្តាយ ចំពោះការរាប់អានគ្នាជាមិត្តនេះ។ ប៉ុន្តែទ្រង់មិនបានឆ្លើយតបទៅនឹងសំណើសុំការអត្ថាធិប្បាយនោះទេ ចាប់តាំងពីការចេញផ្សាយឯកសារចុងក្រោយបង្អស់។

ភ្លាមៗនេះ មិនមានការអត្ថាធិប្បាយអ្វីឡើយពីព្រះបរមរាជវាំង Buckingham ពាក់ព័ន្ធនឹងសេចក្ដីរាយការណ៍ចាប់ខ្លួនសាច់ញាតិរាជវង្សនេះ៕