ជនប៉ាឡេស្ទីនជម្លៀសខ្លួនដែលកំពុងជ្រកកោននៅក្នុងសំពត់តង់ស្ថិតក្នុងទីក្រុង Khan Younis តំបន់ហ្កាហ្សានៅថ្ងៃព្រហស្បតិ៍នេះ សង្ឃឹមថានឹងមានការសាងសង់ឡើងវិញក្នុងដែនដីបិទច្រកមួយនេះ ស្របពេលក្រុមប្រឹក្សាសន្តិភាពដឹកនាំដោយសហរដ្ឋអាមេរិក មាននូវជំនួបក្រុមមេដឹកនាំដំបូងនៅទីក្រុងវ៉ាស៊ីនតោន ។

នៅថ្ងៃព្រហស្បតិ៍នេះ ប្រធានាធិបតីសហរដ្ឋអាមេរិកលោក Donald Trump ធ្វើជាម្ចាស់ផ្ទះជំនួបក្រុមប្រឹក្សាសន្តិភាពនៅទីក្រុងវ៉ាស៊ីនតោន ដើម្បីប្រកាសកញ្ចប់ថវិកា ៥ពាន់លានដុល្លារ សម្រាប់តំបន់ហ្កាហ្សា ។

អ្នកនាំពាក្យសេតវិមានអ្នកស្រី Karoline Leavitt និយាយប្រាប់ក្រុមអ្នកសារព័ត៌មានកាលពីថ្ងៃពុធថា មេដឹកនាំមកពីប្រទេសជាង ២០ នឹងចូលរួមជំនួបមួយនេះ ។

ពលរដ្ឋប៉ាឡេស្ទីនមួយចំនួន បាននិយាយរៀបរាប់ពីស្ថានភាពរស់នៅដ៏លំបាករបស់ពួកគេ អំឡុងរដូវរងា ខណៈពលរដ្ឋខ្លះទៀត មានការព្រួយបារម្ភថា ពួកគេអាចនឹងមិនបានរស់ មើលឃើញហេដ្ឋារចនាសម្ព័ន្ធ ត្រូវបានសាងសង់ឡើងវិញនៅតំបន់ហ្កាហ្សា ។

ជំនួបក្រុមប្រឹក្សាសន្តិភាពកើតមានឡើង បន្ទាប់ពីរដ្ឋបាលរបស់លោក Trump ដែលសហការជាមួយប្រទេសកាតា និងអេហ្ស៊ីប បានចរចាឲ្យមានបទឈប់បាញ់កាលពីខែតុលាឆ្នាំមុន ដើម្បីបញ្ឈប់សង្គ្រាមបំផ្លិចបំផ្លាញរយៈពេល ២ឆ្នាំ នៅតំបន់ហ្កាហ្សា។

សហរដ្ឋអាមេរិក លើកឡើងថា ផែនការនេះបច្ចុប្បន្ន បានចូលដល់ដំណាក់កាលទី២ ដោយផ្តោតលើការរំសាយអាវុធពីក្រុមហាម៉ាស ជាក្រុមសកម្មប្រយុទ្ធប៉ាឡេស្ទីន ដែលការវាយប្រហារមិនធ្លាប់មានពីមុនរបស់ខ្លួន កាលពីថ្ងៃទី៧ ខែតុលា ឆ្នាំ២០២៣ លើអ៊ីស្រាអែល បង្កឲ្យមានការវាយលុកសងសឹកវិញ ៕