ក្នុងកិច្ចប្រជុំដំបូងនៃក្រុមប្រឹក្សាសន្តិភាពនៅទីក្រុងវ៉ាស៊ីនតោនកាលពីថ្ងៃព្រហស្បតិ៍ (១៩ កុម្ភៈ) លោកប្រធានាធិបតីអាមេរិក Donald Trump បានព្រមានអ៊ីរ៉ង់ជាថ្មីម្ដងទៀតថា ទីក្រុងតេអេរ៉ង់ត្រូវតែធ្វើកិច្ចព្រមព្រៀងលើកម្មវិធីនុយក្លេអ៊ែររបស់ខ្លួន បើពុំនោះសោត «រឿងអាក្រក់ៗ» នឹងកើតឡើង ហើយលោកបានដាក់ថ្ងៃផុតកំណត់ចន្លោះពី ១០ ទៅ ១៥ ថ្ងៃ ដើម្បីសម្រេចរឿងនេះ ដែលបានទាក់ទាញការគំរាមកំហែងពីទីក្រុងតេអេរ៉ង់ថា ខ្លួននឹងសងសឹកមូលដ្ឋានទ័ពអាមេរិកក្នុងតំបន់ បើរងការវាយប្រហារ។

ស្របពេលវត្តមានយោធាយ៉ាងច្រើនរបស់អាមេរិកនៅមជ្ឈិមបូព៌ា ដែលបានជំរុញឱ្យមានការភ័យខ្លាចអំពីសង្គ្រាមកាន់តែទូលំទូលាយ លោក Trump បាននិយាយថា កិច្ចចរចាជាមួយអ៊ីរ៉ង់ ដើម្បីបញ្ចប់ការប្រឈមមុខដាក់គ្នាដ៏តានតឹងនេះកំពុងដំណើរការទៅដោយរលូន ប៉ុន្តែក៏បានទាមទារឱ្យទីក្រុងតេអេរ៉ង់ ឈានដល់កិច្ចព្រមព្រៀង «ដ៏មានអត្ថន័យ» មួយ។

លោក Trump ដែលគំរាមវាយប្រហារអ៊ីរ៉ង់ម្តងហើយម្តងទៀត បាននិយាយថា «បើមិនដូច្នោះទេ រឿងអាក្រក់នឹងកើតឡើង»។ លោក Trump បានលើកឡើងពីការវាយប្រហារតាមអាកាសរបស់អាមេរិក កាលពីខែមិថុនាកន្លងទៅ ដោយនិយាយថា សក្តានុពលនុយក្លេអ៊ែររបស់អ៊ីរ៉ង់ត្រូវបាន «បំផ្លិចបំផ្លាញ» ដោយបន្ថែមថា «អាមេរិកប្រហែលជាត្រូវឈានមួយជំហានទៀត ឬក៏ប្រហែលជាមិនធ្វើអ្វីដែរ»។

លោកបន្តថា «គ្រប់គ្នានឹងដឹងច្បាស់ក្នុងពេលប្រហែល ១០ ថ្ងៃខាងមុខ»។ នៅពេលត្រូវបានស្នើឱ្យពន្យល់បន្ថែមនៅពេលក្រោយ លោកបានប្រាប់អ្នកយកព័ត៌មាននៅលើយន្តហោះ Air Force One ថា «លោកគិតថា ពេលវេលាគ្រប់គ្រាន់ពី ១០ថ្ងៃ ទៅ ១៥ ថ្ងៃជាអតិបរមា»។ ប៉ុន្តែលោកបានបដិសេធមិនបញ្ជាក់ឱ្យច្បាស់លាស់ទេ ដោយគ្រាន់តែព្រមានម្តងទៀតអំពី «រឿងអាក្រក់ៗ» ហើយទទូចថា អ៊ីរ៉ង់នឹងត្រូវតែធ្វើកិច្ចព្រមព្រៀងមួយ ទោះតាមមធ្យោបាយណាក៏ដោយ។

អ៊ីវ៉ង់វិញ ក៏បានចេញការព្រមានរបស់ខ្លួនផងដែរ។ ក្នុងលិខិតមួយផ្ញើទៅកាន់អគ្គលេខាធិការអង្គការសហប្រជាជាតិ ទីក្រុងតេអេរ៉ង់និយាយថា ខ្លួននឹងមិនចាប់ផ្តើមសង្គ្រាមណាមួយឡើយ ប៉ុន្តែថា «ក្នុងករណីដែលខ្លួនត្រូវទទួលរងនូវការឈ្លានពានខាងយោធា អ៊ីរ៉ង់នឹងឆ្លើយតបយ៉ាងដាច់ណាត់ និងសមាមាត្រ» ក្នុងការអនុវត្តសិទ្ធិការពារខ្លួន៕