អ៊ីរ៉ង់ បានប្រាប់អគ្គលេខាធិការអង្គការសហប្រជាជាតិ លោក Antonio Guterres នៅក្នុងលិខិតមួយកាលពីថ្ងៃព្រហស្បតិ៍ (១៩ កុម្ភៈ) ថា ទីក្រុងតេអេរ៉ង់ នឹងចាត់ទុកមូលដ្ឋានទ័ព គ្រឿងបរិក្ខារ និងទ្រព្យសម្បត្តិរបស់ «កម្លាំងអរិភាព» ក្នុងតំបន់មជ្ឈិមបូព៌ាជាគោលដៅស្របច្បាប់ ប្រសិនបើខ្លួនប្រឈមសកម្មភាពយោធា ហើយថា ក្នុងករណីដែលរងសកម្មភាពយោធា អ៊ីរ៉ង់នឹងអនុវត្តសិទ្ធិការពារខ្លួន។

បេសកកម្មអចិន្ត្រៃយ៍របស់អ៊ីរ៉ង់ប្រចាំអង្គការសហប្រជាជាតិ បាននិយាយនៅក្នុងលិខិតនោះថា វោហាសាស្ត្ររបស់លោកប្រធានាធិបតីអាមេរិក Donald Trump ចំពោះអ៊ីរ៉ង់ «បង្ហាញពីហានិភ័យពិតប្រាកដនៃការវាយប្រហារខាងយោធា» ដោយបន្ថែមថា អ៊ីរ៉ង់មិនចង់បានសង្គ្រាមទេ ប៉ុន្តែអ៊ីរ៉ង់នឹងឆ្លើយតប «យ៉ាងដាច់ណាត់» ប្រសិនបើរងការវាយប្រហារខាងយោធា។

ប្រតិកម្មរបស់អ៊ីរ៉ង់ បានកើតឡើងបន្ទាប់ពីលោក Trump បានព្រមានថា អ៊ីរ៉ង់ត្រូវតែធ្វើ «កិច្ចព្រមព្រៀងដ៏មានអត្ថន័យ» ក្នុងកិច្ចចរចាជាមួយទីក្រុងវ៉ាស៊ីនតោន ក្នុងពេល ១០ ថ្ងៃ ឬ ១៥ថ្ងៃខាងមុខ បើមិនដូច្នោះទេ «រឿងអាក្រក់នឹងកើតឡើង» ខណៈលោកបានដាក់ពង្រាយនាវាចម្បាំង យន្តហោះចម្បាំង និងសម្ភារៈយោធាផ្សេងទៀតយ៉ាងច្រើនសន្ធឹកសន្ធាប់ទៅកាន់តំបន់មជ្ឈិមបូព៌ា។

ការអត្ថាធិប្បាយរបស់លោក Trump បានកើតឡើងភ្លាមៗបន្ទាប់ពីនាយករដ្ឋមន្ត្រីអ៊ីស្រាអែល លោក Benjamin Netanyahu បានចេញការព្រមានផ្ទាល់ខ្លួនរបស់លោកទៅកាន់អ៊ីរ៉ង់ថា «ប្រសិនបើបក្សពួករបស់មេដឹកនាំកំពូលអ៊ីរ៉ង់ Ayatollah ធ្វើខុស ហើយវាយប្រហារអ៊ីស្រាអែល នោះពួកគេនឹងទទួលបានការឆ្លើយតបដែលពួកគេមិននឹកស្មានដល់»៕