អង្គការសហប្រជាជាតិ បាននិយាយកាលពីថ្ងៃព្រហស្បតិ៍ ទី ១៩ ខែកុម្ភៈ ថា សហរដ្ឋអាមេរិក បានបង់ប្រាក់ប្រហែល១៦០លានដុល្លារអាមេរិកក្នុងចំណោមជិត ៤ ពាន់លានដុល្លារអាមេរិក ដែលខ្លួនជំពាក់អង្គការសហប្រជាជាតិ ហើយប្រធានាធិបតី លោក Donald Trump បានសន្យាផ្តល់ប្រាក់បន្ថែមទៀតដល់អង្គការពិភពលោកដែលខ្វះហិរញ្ញវត្ថុ។

លោក Stéphane Dujarric អ្នកនាំពាក្យអង្គការសហប្រជាជាតិបានប្រាប់សារព័ត៌មាន AP ថា ការបង់ប្រាក់របស់រដ្ឋបាលលោក Trump កាលពីសប្តាហ៍មុន ត្រូវបានកំណត់សម្រាប់ថវិកាប្រតិបត្តិការទៀងទាត់របស់អង្គការសហប្រជាជាតិ។

អង្គការសហប្រជាជាតិបាននិយាយថា សហរដ្ឋអាមេរិកជំពាក់ថវិកាចំនួន ២.១៩៦ ពាន់លានដុល្លារអាមេរិក រួមទាំង៧៦៧លានដុល្លារអាមេរិកសម្រាប់ឆ្នាំនេះ ព្រមទាំង១,៨ពាន់លានដុល្លារអាមេរិកជាថវិកាដាច់ដោយឡែកសម្រាប់ប្រតិបត្តិការរក្សាសន្តិភាពរបស់អង្គការសហប្រជាជាតិ។

លោក Antonio Guterres អគ្គលេខាធិការអង្គការសហប្រជាជាតិបានព្រមានកាលពីចុងខែមុនថា អង្គការពិភពលោកនេះប្រឈមនឹង «ការដួលរលំផ្នែកហិរញ្ញវត្ថុដ៏ឆាប់រហ័ស» លុះត្រាតែច្បាប់ហិរញ្ញវត្ថុរបស់ខ្លួនត្រូវបានកែសម្រួល ឬប្រទេសជាសមាជិកទាំង ១៩៣ប្រទេស បង់ប្រាក់កាតព្វកិច្ចរបស់ពួកគេ ជាសារមួយដែលសំដៅយ៉ាងច្បាស់ទៅលើសហរដ្ឋអាមេរិក។ លោកបាននិយាយនៅក្នុងលិខិតមួយផ្ញើទៅកាន់ប្រទេសសមាជិកទាំងអស់ថា ប្រាក់សម្រាប់ថវិកាទៀងទាត់អាចនឹងអស់នៅខែកក្កដា ដែលអាចធ្វើឲ្យប៉ះពាល់យ៉ាងខ្លាំងដល់ប្រតិបត្តិការរបស់អង្គការសហប្រជាជាតិ។