លោក Fu Cong តំណាងអចិន្ត្រៃយ៍របស់ចិនប្រចាំអង្គការសហប្រជាជាតិ បានព្រមានកាលពីថ្ងៃព្រហស្បតិ៍ ១៩កុម្ភៈសប្ដាហ៍នេះ ថា ការចូលរួមផ្នែកយោធាណាមួយដោយជប៉ុនក្នុងបញ្ហាកោះតៃវ៉ាន់នឹងប្រឈមការប៉ះទង្គិចគ្នាដោយផ្ទាល់។

លោក Fu បានធ្វើអត្ថាធិប្បាយបែបនេះក្នុងអំឡុងពេលកិច្ចប្រជុំពេញអង្គនៃសម័យប្រជុំឆ្នាំ ២០២៦ នៃគណៈកម្មាធិការពិសេសស្តីពីធម្មនុញ្ញអង្គការសហប្រជាជាតិ និងស្តីពីការពង្រឹងតួនាទីរបស់អង្គការសហប្រជាជាតិ។

លោក Fu បាននិយាយថា មេដឹកនាំជប៉ុនក្នុងប៉ុន្មានឆ្នាំថ្មីៗនេះបានធ្វើសកម្មភាពប្រឆាំងនឹងប្រវត្តិសាស្ត្រ។ ជប៉ុនបានភ្ជាប់បញ្ហាតៃវ៉ាន់យ៉ាងច្បាស់លាស់ទៅនឹងអ្វីដែលហៅថា «ស្ថានភាពគំរាមកំហែងដល់ការរស់រាន» ដោយបានឆ្លើយតបដោយផ្អែកលើសម្ព័ន្ធភាពជប៉ុន-សហរដ្ឋអាមេរិក ហើយបានព្យាយាមប្រើ «ស្វ័យការពារ» ជាលេសដើម្បីធ្វើអន្តរាគមន៍ក្នុងបញ្ហាតំបន់តៃវ៉ាន់។

លោក Fu បាននិយាយថា អំណះអំណាងខុសឆ្គងទាំងនេះគ្មានមូលដ្ឋានច្បាប់ទេ។កោះតៃវ៉ាន់គឺជាផ្នែកមួយដែលមិនអាចកាត់ផ្តាច់បាននៃទឹកដីរបស់ប្រទេសចិន ហើយរបៀបដោះស្រាយបញ្ហាតៃវ៉ាន់គឺជាកិច្ចការផ្ទៃក្នុងរបស់ប្រទេសចិន។ គ្មានប្រទេសណាផ្សេងទៀតមានសិទ្ធិជ្រៀតជ្រែកឡើយ។

លោក Fu ចង្អុលបង្ហាញថា អំណះអំណាងបែបនេះក្បត់កាតព្វកិច្ចរបស់ប្រទេសជប៉ុនក្នុងនាមជាប្រទេសចាញ់សង្គ្រាម រំលោភលើសេចក្តីប្រកាសទីក្រុងគែរ សេចក្តីប្រកាសទីក្រុង Potsdam និងឯកសារចុះចាញ់សង្គ្រាមរបស់ជប៉ុន ក៏ដូចជាគោលការណ៍នៃធម្មនុញ្ញអង្គការសហប្រជាជាតិស្តីពីការគោរពអធិបតេយ្យភាព បូរណភាពទឹកដី និងការមិនជ្រៀតជ្រែកក្នុងកិច្ចការផ្ទៃក្នុងរបស់ប្រទេសដទៃ៕