កូដកម្ម បានធ្វើឲ្យរដ្ឋធានី Buenos Aires របស់ប្រទេសអាហ្សង់ទីនភាគច្រើនជាប់គាំង ខណៈអាជីវកម្មបិទទ្វារ ហើយក្រុមអ្នកតវ៉ា បានចេញធ្វើបាតុកម្មនៅតាមដងផ្លូវដើម្បីតវ៉ាប្រឆាំងកំណែទម្រង់ការងារដែលបានស្នើឡើងដោយប្រធានាធិបតី លោក Javier Milei។

កូដកម្មរយៈពេល២៤ម៉ោងកាលពីថ្ងៃព្រហស្បតិ៍ គឺជាលើកទីបួននៃអាណត្តិរបស់ លោក Milei ជាប្រធានាធិបតី ទោះបីជាកូដកម្មទ្រង់ទ្រាយតូចៗបានកើតឡើងជាប្រចាំចាប់តាំងពីលោកឡើងកាន់តំណែងក្នុងឆ្នាំ២០២៣ក៏ដោយ។ ជាលទ្ធផលនៃការតវ៉ា រថភ្លើងក្រោមដីត្រូវបានបិទនៅទីក្រុង Buenos Aires។ ខ្សែរថយន្តក្រុងកាន់តែថយចុះក្នុងដំណើរការ ហើយក្រុមហ៊ុន Aerolineas Argentinas ជាក្រុមហ៊ុនអាកាសចរណ៍រដ្ឋ ត្រូវបានរំពឹងថានឹងលុបចោលជើងហោះហើរចំនួន២៥៥វ៉ុលដែលខាតបង់ទឹកប្រាក់៣០០លានដុល្លារ ហើយសូម្បីតែធនាគារ និងសាលារៀន ក៏បានបិទទ្វារផងដែរដើម្បីសាមគ្គីភាពក្នុងកូដកម្មនេះ។

សហជីពធំបំផុតមួយរបស់ប្រទេសអាហ្សង់ទីន គឺសហព័ន្ធការងារទូទៅ (CGT) បានអំពាវនាវឲ្យពលរដ្ឋបង្ហាញការប្រឆាំងចំពោះកំណែទម្រង់ការងារ «នៅតាមដងផ្លូវ ក្នុងសភា ក្នុងតុលាការ និងនៅគ្រប់កន្លែងធ្វើការ»។ សហជីព បានសរសេរក្នុងសារមួយលើបណ្តាញផ្សព្វផ្សាយសង្គមថា «ប្រសិនបើពួកគេវាយប្រហារសិទ្ធិកម្មករ នោះពួកគេវាយប្រហារឧស្សាហកម្មរបស់ប្រទេស និងអនាគតរបស់ប្រទេស»។ «សិទ្ធិ មិនអាចចរចាបានទេ»។ លោក Milei ជាអ្នកនយោបាយសេរីនិយមម្នាក់ បានធ្វើយុទ្ធនាការកាត់បន្ថយបទប្បញ្ញត្តិដែលលោកគិតថារារាំងដល់សេដ្ឋកិច្ចរបស់ប្រទេសអាហ្សង់ទីន។ សេចក្តីស្នើច្បាប់កំណែទម្រង់ការងាររួមមានបទប្បញ្ញត្តិដើម្បីធ្វើឱ្យវាកាន់តែងាយស្រួលសម្រាប់ក្រុមហ៊ុនក្នុងការបណ្តេញបុគ្គលិក ព្រមទាំងកាត់បន្ថយប្រាក់បំណាច់ការងារ។