ការប្រកួតកីឡាបាល់ទាត់លីគកំពូលកម្ពុជា (Cambodian Premier League) រដូវ​កាល​២០២៥-២០២៦ ត្រូវបញ្ចប់ដំណាក់កាលទី១នៅចុងសប្ដាហ៍នេះហើយ ខណៈ​ដែល​ពេល​នេះ​អ្នក​គាំទ្រ​បាល់ទាត់ជាតិកំពុងតែតាមដានថាតើក្លឹបបាល់ទាត់វិសាខា បន្តស្ថិតនៅតំបន់៦​ក្រុម​លើ​គេ រឺអឹមអូអាយ កំពង់ដេវ៉ា ឡើងមកតំបន់នេះវិញ។

ក្លឹបបាល់ទាត់ព្រះខ័នរាជស្វាយរៀង ភ្នំពេញក្រោន អង្គរថាយហ្គឺរ ណាហ្កាវើលដ៍ និងក្លឹបបាល់ទាត់បឹងកេត ធានាកៅអីក្នុងតំបន់៦ក្រុមលើគេរួចរាល់ហើយ នៅឡើយវិសាខា និងអឹមអូអាយកំពង់ដេវ៉ា ដែលត្រូវប្រជែងជាមួយគូប្រកួតផ្សេងគ្នា។

ថ្ងៃសៅរ៍ទី២១ ខែកុម្ភៈ ឆ្នាំ២០២៦នេះ ក្លឹបបាល់ទាត់វិសាខា ត្រូវស្វែងរកពិន្ទុ ជាមួយភ្នំពេញក្រោនដែលត្រូវការពិន្ទុប្រជែងជើងឯកជាមួយព្រះខ័នរាជស្វាយរៀង ខណៈដែលអឹមអូអាយកំពង់ដេវ៉ា ត្រូវការបីពិន្ទុដាច់ខាតពេលជួបអាយអេសអាយ ដង្កោសែនជ័យថ្ងៃជាមួយគ្នា។

ពេលនេះ វិសាខា ឈរនៅចំណាត់លេខ៦បណ្ដោះអាសន្ន (មាន២៩ពិន្ទុ)មិនទាន់សុវត្ថិភាពនៅឡើយព្រោះគម្លាតពីអឹមអូអាយដែលឈរនៅលេខ៧ តែ២ពិន្ទុប៉ុណ្ណោះ។ ដូច្នោះវិសាខាត្រូវការឈ្នះភ្នំពេញក្រោនដាច់ខាត ដើម្បីរក្សាកៅអីតំបន់៦ក្រុមលើគេ មិនខ្វល់ពីលទ្ធផលអឹមអូអាយ កំពង់ដេវ៉ាយ៉ាងណានោះទេ។ ផ្ទុយទៅវិញវិសាខា នឹងធ្លាក់ចេញពីតំបន់ប្រជែងជើងឯក បើភ្លាត់ចាញ់ រឺស្មើ ហើយ អឹមអូអាយ ឈ្នះអាយអេសអាយដង្កោសែនជ័យ។

សម្រាប់ក្លឹបភ្នំពេញក្រោន ក៏ត្រូវការពិន្ទុចាំបាច់ដែរពីវិសាខា​ ដើម្បីប្រជែងជាមួយក្រុមកំពូលតារាងព្រះខ័នរាជស្វាយរៀង ព្រោះពេលនេះកំពុងចាញ់ព្រះខ័នរាជ៥ពិន្ទុ ក្រោយចាញ់អង្គរថាយហ្គឺរកាលពីសប្ដាហ៍មុន។ ជើងទី១ ថ្ងៃទី៨ ខែវិច្ឆិកា វិសាខា និងភ្នំពេញក្រោន ស្មើគ្នា១ទល់១។ ពេលនោះភ្នំពេញក្រោននាំមុខមុនដោយកីឡាករ DYER MOSES JOHN នាទីទី៥៧​ ប៉ុន្តែ១៦នាទីបន្ទាប់ អ៊ុក សុវណ្ណ ជួយឱ្យវិសាខាតាមស្មើ។ អឹម អូអាយ កំពង់ដេវ៉ា ជួបជាមួយអាយអេសអាយ ដង្កោសែនជ័យ ក៏មិនស្រួលប៉ុន្មាននោះដែរ ព្រោះកាលពីជើងទីមួយ ក្រុមទាំងពីរបានត្រឹមស្មើគ្នា ០ទល់០ ហើយសប្ដាហ៍មុន អាយអេសអាយធ្វើបានល្អដោយយកឈ្នះកងយោធពលខេមរភូមិន្ទ ៣ទល់០ ខណៈដែលអឹមអូអាយចាញ់ព្រះខ័នរាជស្វាយរៀង ១ទល់នឹង២។

ការប្រកួតផ្សេងទៀតនៅសប្ដាហ៍ចុងក្រោយនេះ ឡាយហ្វខេត្តព្រះសីហុន ទទួលណាហ្កាវើលដ៍។ ចំណែកថ្ងៃអាទិត្យគិរីវង់សុខសែនជ័យ​ ជួបព្រះខ័នរាជស្វាយរៀង និងអង្គរថាយហ្គឺរ ប្រកួតជាមួយកងយោធពលខេមរភូមិន្ទ៕