នៅក្នុងបទសម្ភាសន៍ដដែលនេះជាមួយប្រព័ន្ធផ្សព្វផ្សាយ Fox News របស់សហរដ្ឋអាមេរិក សម្ដេច​បវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានសង្កត់ធ្ងន់ថា កម្ពុជា​មិន​អាចមានមូលដ្ឋានយោធាបរទេសនោះឡើយ ដូចដែលបានចែងនៅក្នុងរដ្ឋធម្មនុញ្ញ ដោយ​សំដៅ​ទៅលើមូលដ្ឋានកងទ័ពជើងទឹករាម ដ៏ចម្រូងចម្រាស នៅខេត្តព្រះសីហនុ។

សម្ដេច​ធិបតីមានប្រសាសន៍ថា «រដ្ឋធម្មនុញ្ញរបស់យើងចែងថា ពុំមាន​មូលដ្ឋាន​យោធា​បរទេស​ណា​មួយ​អាចស្ថិតនៅលើទឹកដីកម្ពុជាបានទេ»។

អស់រយៈ​ពេលជាច្រើនឆ្នាំមកហើយ ក្រុមមន្ត្រីអាមេរិក បានលើកឡើងពីក្ដីបារម្ភថា កម្ពុជា​បាន​ផ្តល់​សិទ្ធិ​ចូលប្រើប្រាស់ផ្តាច់មុខដល់ប្រទេសចិន ប៉ុន្តែសម្ដេចធិបតី ហ៊ុន ម៉ាណែត បាន​បញ្ជាក់​ច្បាស់​ៗ​ជា​ថ្មីថា មូលដ្ឋាននេះគឺស្ថិតនៅក្រោមការគ្រប់គ្រងរបស់កម្ពុជា។

សម្ដេចធិបតី ហ៊ុន ម៉ាណែត បានសង្កត់ធ្ងន់ថា៖ «យើងមានអគារពហុជាតិនានានៅទីនោះ រចនា​សម្ព័ន្ធ​អចិន្ត្រៃយ៍​ដែ​លរង់ចាំទទួលដៃគូទស្សនកិច្ចទាំងអស់របស់យើង។ ពុំមានអ្វីត្រូវលាក់បាំងទេ នេះ​គឺ​ដើម្បី​ឱ្យមានភាពច្បាស់លាស់ជាមួយមូលដ្ឋានកងទ័ពជើងទឹករាម។ សកម្មភាព​ដ៏​ជាក់​ស្តែង​នៃ​ការ​ស្វាគមន៍ដំណើរទស្សនកិច្ចនានារបស់នាវាពហុជាតិ បានបង្ហាញយ៉ាងច្បាស់ថា កម្ពុជា​មិន​ត្រូវ​បាន​ប្រើ​ប្រាស់ផ្ដាច់មុខជាមូលដ្ឋានកងទ័ពជើងទឹក សម្រាប់កិច្ច​សហប្រតិបត្តិការ​ជាមួយ​ប្រទេស​ចិន​នោះទេ»។

នាវាចម្បាំង USS Cincinnati របស់សហរដ្ឋអាមេរិក បានចូលចតនៅកំពង់ផែរាម នៅចុងខែមករា កន្លង​ទៅ ដែលជាដំណើរទស្សនកិច្ចលើកដំបូងរបស់នាវាចម្បាំងអាមេរិក ចាប់តាំង​ពី​មូលដ្ឋាន​នេះ​ត្រូវ​បាន​ជួស​ជុលឡើងវិញ។

សម្ដេចធិបតី ហ៊ុន ម៉ាណែត បានមានប្រសាសន៍ថា «យើង​សង្ឃឹមថា​នឹង​មាន​កិច្ច​សហ​ប្រតិបត្តិ​ការ​​កាន់​តែទូលំទូលាយជាមួយសហរដ្ឋអាមេរិក»៕