ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃព្រហស្បតិ៍ ត្រូវបានអំពាវនាវឲ្យដាក់សម្ពាធលើ  អេមី រ៉ាតអារ៉ាប់រួម (UAE) ឲ្យឈប់ផ្តល់អាវុធដល់កងកម្លាំងគាំទ្ររហ័ស (RSF) ដែលជាក្រុមយោធាដែលកំពុងធ្វើសង្គ្រាមមួយនៅក្នុងប្រទេសស៊ូដង់ ស្របពេលមានការព្រមានថា អំពើឃោរឃៅដែលមាន «លក្ខណៈជាអំពើប្រល័យពូជសាសន៍» កំពុងរីករាលដាល ហើយស្ថានភាពនៅក្នុងប្រទេសនេះ កំពុងប្រឈមនឹងហានិភ័យនៃការបង្កអស្ថិរភាពក្នុងតំបន់បន្ថែមទៀត។

សកម្មជនស៊ូដង់ អ្នកស្រី Hala Alkarib បាននិយាយថា៖«ការជ្រៀតជ្រែកពីខាងក្រៅដែលមិនបានត្រួតពិនិត្យ» កំពុងអនុញ្ញាតឲ្យអំពើឃោរឃៅបន្ត។ អ្នកស្រីបានលើកឡើងពីឯកសាររបស់ក្រុមអ្នកជំនាញអង្គការសហប្រជាជាតិ និងអង្គការមិនមែនរដ្ឋាភិបាលអន្តរជាតិអំពីអាវុធ និងគ្រឿងយុទ្ធោបករណ៍ ដែលត្រូវបានដឹកជញ្ជូនទៅកាន់តំបន់ Darfur «រួមទាំងដោយអេមីរ៉ាតអារ៉ាប់រួម ដែលជាការរំលោភលើការហាមឃាត់អាវុធរបស់ក្រុមប្រឹក្សាសន្តិសុខUN។

អ្នកស្រីបានប្រាប់សមាជិកក្រុមប្រឹក្សានេះថា៖«អ្នកអាចបញ្ឈប់អំពើហិង្សាដោយដាក់សម្ពាធលើអ្នកគាំទ្រដ៏មានឥទ្ធិពលរបស់កងកម្លាំងគាំទ្ររហ័ស ជាមួយនឹងផលវិបាកផ្នែកសេដ្ឋកិច្ច នយោបាយ និងព្រហ្មទណ្ឌ»។

ក្រុមប្រឹក្សានេះ ក៏បានឮការព្រមានពីអ្នកស្រី Alkarib និងមន្ត្រីជាន់ខ្ពស់អង្គការសហប្រជាជាតិថា បន្ទាប់ពីសង្គ្រាមជាង ១.000ថ្ងៃ ជនស៊ីវិលប្រឈមនឹងហានិភ័យថ្មីនៃអំពើឃោរឃៅទ្រង់ទ្រាយធំនៅតំបន់ Darfur និងតំបន់ Kordofan។ 

នាព្រឹកថ្ងៃព្រហស្បតិ៍ បេសកកម្មស្វែងរកការពិតឯករាជ្យអន្តរជាតិសម្រាប់ប្រទេសស៊ូដង់ បានចេញរបាយការណ៍មួយ ដែលពិពណ៌នាអំពីអំពើឃោរឃៅដែលប្រព្រឹត្តដោយ RSF នៅក្នុង និងជុំវិញទីក្រុង El-Fasher នៅចុងខែតុលា ឆ្នាំមុនថា ជា «ដំណាក់កាលនៃផ្លូវប្រល័យពូជសាសន៍»៕