កាសែត The Wall Street Journal បានរាយការណ៍ ដោយដកស្រង់ប្រភពថា ប្រធានាធិបតីអាមេរិក     លោក ដូណាល់ ត្រាំ កំពុងពិចារណាអំពីការវាយប្រហារយោធាមានកំណត់លើអ៊ីរ៉ង់ ដើម្បីដាក់សម្ពាធលើទីក្រុងតេអេរ៉ង់ ឲ្យទទួលយកលក្ខខណ្ឌនៃកិច្ចព្រមព្រៀងនុយក្លេអ៊ែររបស់ទីក្រុងវ៉ាស៊ីនតោន ខណៈពេលដែលជៀសវាងការវាយប្រហារទ្រង់ទ្រាយធំ។

យោងតាមព័ត៌មានរបស់សារព័ត៌មាននេះ ការវាយប្រហារបែបនេះ អាចកើតឡើងក្នុងរយៈពេលប៉ុន្មានថ្ងៃទៀត។ ការវាយប្រហារនោះ នឹងកំណត់គោលដៅលើមូលដ្ឋានយោធា និងរដ្ឋាភិបាលអ៊ីរ៉ង់។ ប្រសិនបើទីក្រុងតេអេរ៉ង់ បដិសេធមិនបំពេញតាមការទាមទាររបស់ទីក្រុងវ៉ាស៊ីនតោន ក្នុងការបោះបង់ចោលការចម្រាញ់សារធាតុអ៊ុយនីរ៉ាញ៉ូម សហរដ្ឋអាមេរិកនឹងចាប់ផ្តើមយុទ្ធនាការយោធាទ្រង់ទ្រាយធំមួយ ដែលអាចមានបំណង «ផ្តួលរំលំរបបក្រុងតេអេរ៉ង់»។

កាសែតនេះ បានកត់សម្គាល់ថា មេដឹកនាំអាមេរិករូបនេះ មិនទាន់បានធ្វើការសម្រេចចិត្តចុងក្រោយទាក់ទងនឹងការវាយប្រហារដែលអាចកើតមានលើអ៊ីរ៉ង់នៅឡើយទេ។ អ្នកនាំពាក្យសេតវិមាន លោកស្រី Anna Kelly បានប្រាប់ The Wall Street Journal ថា៖«មានតែលោកប្រធានាធិបតី ត្រាំទេ ដែលដឹងថា លោកអាចធ្វើអ្វី ឬមិនអាចធ្វើអ្វីបាន»។

នាពេលមុននេះ លោក ត្រាំ បាននិយាយថា លោកផ្តល់ពេលអតិបរមា ១៥ថ្ងៃ ដើម្បីឈានដល់កិច្ចព្រមព្រៀងជាមួយអ៊ីរ៉ង់៕