សារព័ត៌មាន The Times បានសរសេរដោយដកស្រង់ប្រភពថា ចក្រភពអង់គ្លេសមិនអនុញ្ញាតឲ្យសហរដ្ឋអាមេរិកប្រើប្រាស់មូលដ្ឋានយោធារបស់ខ្លួន ដើម្បីវាយប្រហារលើអ៊ីរ៉ង់ទេ។ 

យោងតាមកាសែតនេះ ទីក្រុងវ៉ាស៊ីនតោនបានរៀបចំផែនការលម្អិតនៃប្រតិបត្តិការយោធាប្រឆាំងនឹងអ៊ីរ៉ង់ ដែលរួមមានការប្រើប្រាស់មូលដ្ឋានរួមគ្នារវាងសហរដ្ឋអាមេរិក និងចក្រភពអង់គ្លេសនៅលើកោះ Diego Garcia ក្នុងមហាសមុទ្រឥណ្ឌា និងមូលដ្ឋានកងទ័ពអាកាស Fairford នៅក្នុងទីក្រុង Gloucestershire នៃចក្រភពអង់គ្លេស ដែលជាអាកាសយានដ្ឋានអឺរ៉ុបតែមួយគត់របស់កងទ័ពអាកាសសហរដ្ឋអាមេរិកសម្រាប់យន្តហោះទម្លាក់គ្រាប់បែកធុនធ្ងន់។

យោងតាម The Times ទីក្រុងឡុងដ៍មិនទាន់បានអនុញ្ញាតឲ្យប្រើប្រាស់មូលដ្ឋានទាំងនេះ នៅឡើយទេ ដោយខ្លាចថា ការវាយប្រហាររបស់សហរដ្ឋអាមេរិកលើអ៊ីរ៉ង់ នឹងបង្កើតជា «ការរំលោភច្បាប់អន្តរជាតិ»។

សារព័ត៌មាននេះ បានសរសេរថា ជំហររបស់រដ្ឋាភិបាលចក្រភពអង់គ្លេស បានបង្កឲ្យមានកំហឹងពីប្រធានាធិបតីសហរដ្ឋអាមេរិក លោក ដូណាល់ ត្រាំ ដែលបាន «វាយប្រហារ»ជាសាធារណៈចំពោះកិច្ចព្រមព្រៀងរវាងចក្រភពអង់គ្លេស និងប្រទេសម៉ូរីស ដើម្បីប្រគល់អធិបតេយ្យភាពលើកោះ Chagos ដែលជាទីតាំងមូលដ្ឋាន Diego Garcia ទៅឲ្យម៉ូរីស។ ឯកសារនេះ ត្រូវបានចុះហត្ថលេខានៅថ្ងៃទី ២២ ខែឧសភា ឆ្នាំ ២០២៥ ប៉ុន្តែមិនទាន់ត្រូវបានសភាចក្រភពអង់គ្លេសផ្តល់សច្ចាប័ននៅឡើយទេ។

កាលពីថ្ងៃពុធ លោក ត្រាំ បានសរសេរនៅលើប្រព័ន្ធផ្សព្វផ្សាយសង្គម Truth Social ថា នាយករដ្ឋមន្ត្រីចក្រភពអង់គ្លេស Keir Starmer កំពុងធ្វើ «កំហុសធំមួយ» ដោយប្រគល់ប្រជុំកោះនេះ ទៅឲ្យប្រទេស ម៉ូរីស ដោយបន្ថែមថា រដ្ឋាភិបាលចក្រភពអង់គ្លេស មិនគួរចាត់វិធានការដែលអាចនាំឲ្យបាត់បង់ការគ្រប់គ្រងលើមូលដ្ឋាន Diego Garcia នោះទេ៕