កាលពីថ្ងៃពុធ (១៨ កុម្ភៈ) សមាជិកសភាអាមេរិកពីររូបគឺ លោក Ro Khanna និងលោក Thomas Massie បាននិយាយថា ពួកគេមានគម្រោងបង្ខំឱ្យមានការបោះឆ្នោតនៅសភាអាមេរិក ក្នុងសប្តាហ៍ក្រោយនេះ លើអំណាចសង្គ្រាម ដែលតម្រូវឱ្យមានការយល់ព្រមពីសភាជាមុនសិន មុនពេលដែលលោកប្រធានាធិបតី Donald Trump អាចអនុញ្ញាតឱ្យមានសកម្មភាពយោធាប្រឆាំងនឹងអ៊ីរ៉ង់។

ការជំរុញនេះកើតឡើងខណៈដែលភាពតានតឹងឡើងកម្ដៅខ្លាំងជុំវិញលទ្ធភាពនៃការវាយប្រហាររបស់សហរដ្ឋអាមេរិក លើអ៊ីរ៉ង់។ ការបោះឆ្នោតអាចនឹងមានភាពតឹងតែង នៅក្នុងសភាដែលមានការបែកបាក់ និងមានសំឡេងលើសខ្វះគ្នាយ៉ាងស្ដួចស្ដើងរវាងបក្សនយោបាយទាំងពីររបស់សហរដ្ឋអាមេរិក ដែលសូម្បីតែការដកខ្លួនមិនគាំទ្រមួយចំនួនតូច ក៏អាចផ្លាស់ប្តូរលទ្ធផលបានដែរ។

ក្នុងការបង្ហោះមួយលើបណ្ដាញសង្គម X កាលពីថ្ងៃពុធ លោក Khanna បាននិយាយថា៖ «ក្រុមមន្ត្រីលោក Trump និយាយថា មានលទ្ធភាព ៩០% នៃការវាយប្រហារលើអ៊ីរ៉ង់ ប៉ុន្តែលោកមិនអាចធ្វើរឿងនេះដោយគ្មានសភាបានទេ»។

សារនេះបន្តថា៖ លោក Massie និងលោក Khanna មានសេចក្តីសម្រេចស្តីពីអំណាចសង្គ្រាមមួយ ដើម្បីជជែកពិភាក្សា និងបោះឆ្នោតលើសង្គ្រាម នៅមុនពេលដាក់កងទ័ពអាមេរិកឱ្យស្ថិតក្នុងស្ថានភាពគ្រោះថ្នាក់។ សមាជិកសភារូបនេះបន្តថា ពួកគេនឹងបង្ខំឱ្យមានការបោះឆ្នោតលើសំណើសុំដកទ័ពអាមេរិកទៅវិញនេះ ក្នុងសភានៅសប្តាហ៍ក្រោយ ប៉ុន្តែមិនបានបញ្ចាក់លម្អិតនោះទេ។

គួរឱ្យដឹងថា សេចក្តីសម្រេចស្តីពីអំណាចសង្គ្រាម អនុញ្ញាតឱ្យសមាជិកសភា រំលងថ្នាក់ដឹកនាំរបស់គណបក្ស និងបង្ខំឱ្យមានការបោះឆ្នោតលើសកម្មភាពយោធា ហើយនោះជាចំណាត់ការនៅក្នុងសភាមួយ ដែលកម្រនឹងត្រូវប្រើប្រាស់ណាស់ ប៉ុន្តែជាវិធីសាស្រ្តដ៏សំខាន់៕