មន្ត្រីការពារជាតិជាន់ខ្ពស់មួយរូបរបស់អ៊ុយក្រែន បានឱ្យដឹងថា អ៊ុយក្រែន អាចនាំចេញទំនិញ និងសេវាកម្មយោធាក្នុងតម្លៃជាច្រើនពាន់លានដុល្លារនៅឆ្នាំ២០២៦នេះ បន្ទាប់ពីអនុញ្ញាតឱ្យមានការលក់ទៅក្រៅប្រទេសលើកដំបូងក្នុងសម័យសង្គ្រាម ហើយកំពុងពិចារណាដាក់ពន្ធលើការនាំចេញទាំងនោះ។

លោក Davyd Aloian អនុលេខាធិការនៃក្រុមប្រឹក្សាសន្តិសុខ និងការពារជាតិនៃទីក្រុងគីវ បានប្រាប់ទីភ្នាក់ងារសារព័ត៌មានរ៉យទ័រនៅក្នុងបទសម្ភាសន៍មួយថា កាលពីដើមខែកុម្ភៈនេះ គណៈកម្មការរដ្ឋ ដែលដោះស្រាយអាជ្ញាបណ្ណពាក់ព័ន្ធក្នុងសម័យសង្គ្រាម បានអនុម័តពាក្យស្នើសុំភាគច្រើនចំនួន ៤០ច្បាប់ ពីអ្នកផលិតវិស័យការពារជាតិសម្រាប់ការនាំចេញសម្ភារៈ និងសេវាកម្ម។

គួរឱ្យដឹងថា អ៊ុយក្រែនបានបញ្ឈប់ការនាំចេញអាវុធ បន្ទាប់ពីប្រតិបត្តិការយោធារបស់ទីក្រុងមូស្គូ ក្នុងខែកុម្ភៈ ឆ្នាំ២០២២ ហើយបានពឹងផ្អែកយ៉ាងខ្លាំងទៅលើការផ្គត់ផ្គង់អាវុធរបស់បណ្ដាដៃគូ ដើម្បីការពារខ្លួនប្រឆាំងនឹងកងកម្លាំងរុស្ស៊ី។

នៅពេលត្រូវសាកសួរពីសក្តានុពលនាំចេញសម្រាប់ឆ្នាំនេះ លោក Aloian និយាយថា៖ ដោយគិតគូរពីផលិតផលដែលផលិតរួច គ្រឿងបន្លាស់ គ្រឿងបង្គុំ និងសេវាកម្មដែលអាចផ្តល់ជូនបាន អាចមានចំនួន «ច្រើនពាន់លានដុល្លារ»។ ប៉ុន្តែលោកក៏សង្កត់ធ្ងន់ថា តម្រូវការយោធារបស់អ៊ុយក្រែនផ្ទាល់ ត្រូវតែជាអាទិភាព ខណៈកងទ័ពរុស្ស៊ី កំពុងរុលទៅមុខនៅភាគខាងកើតនៃប្រទេស ហើយការវាយប្រហារតាមអាកាសក៏បានសន្ធាប់លើទីប្រជុំជន និងទីក្រុងនានាដែលនៅហួសឆ្ងាយពីជួរមុខទៅទៀត៕