ក្រសួងរតនាគាររបស់ទីក្រុងវ៉ាស៊ីនតោន បាននិយាយនៅក្នុងសេចក្តីថ្លែងការណ៍មួយកាលពីថ្ងៃព្រហស្បតិ៍ (១៩ កុម្ភៈ) ថា សហរដ្ឋអាមេរិក នឹងធ្វើជាម្ចាស់ផ្ទះនៃកិច្ចប្រជុំក្រុមមន្ត្រីហិរញ្ញវត្ថុ G20 នៅទីក្រុង Asheville រដ្ឋ North Carolina នៅចុងខែសីហា និងថ្ងៃទី១ ខែកញ្ញា ឆ្នាំ២០២៦ នេះ។

ក្រសួងបាននិយាយថា លោកប្រធានាធិបតីអាមេរិក Donald Trump នឹងធ្វើជាម្ចាស់ផ្ទះនៃកិច្ចប្រជុំកំពូលមេដឹកនាំ G20 នៅទីក្រុងម៉ៃអាមី នៅថ្ងៃទី១៤-១៥ ខែធ្នូ ឆ្នាំនេះដដែល នៅឯរមណីយដ្ឋាន Trump National Doral ក្នុងទីក្រុងម៉ៃអាមី រដ្ឋ Florida។ គួរឱ្យដឹងថា ភាពជាម្ចាស់ផ្ទះរបស់សហរដ្ឋអាមេរិក នៃក្រុមប្រទេសដែលមានសេដ្ឋកិច្ចធំជាងគេទាំង ២០ របស់ពិភពលោក ឬហៅថា G20 នាពេលខាងមុខនេះ នឹងក្លាយជាព្រឹត្តិការណ៍លើកដំបូងនៅអាមេរិក ចាប់តាំងពីឆ្នាំ ២០០៩ មក។

ដោយប្រកាសពីអាទិភាព និងកាលវិភាគជំនួបហិរញ្ញវត្ថុ G20 ឆ្នាំ២០២៦នេះ លោក Scott Bessent រដ្ឋមន្ត្រីក្រសួងហិរញ្ញវត្ថុសហរដ្ឋអាមេរិក បាននិយាយថា រដ្ឋបាលនឹងស្វះស្វែងដឹកនាំក្រុមនេះឆ្ពោះទៅរកអ្វីដែលលោកពិពណ៌នាថាជា «បេសកកម្មស្នូល» របស់ខ្លួន តាមរយៈរបៀបវារៈដែលមានលក្ខណៈសាមញ្ញនិងផ្តោតលើលទ្ធផល ដោយផ្តោតលើគោលនយោបាយសេដ្ឋកិច្ចដែលជំរុញកំណើន៕