មន្ត្រីអង្គការសហប្រជាជាតិបានព្រមានពីការវាយប្រហារដោយយានដ្រូនដ៏បង្ហូរឈាមធ្វើឡើងដោយភាគីទាំងពីរនៅក្នុងសង្គ្រាមស៊ីវិលស៊ូដង់ ខណៈក្បួនរថយន្តមនុស្សធម៌បានទៅដល់ទីក្រុងចំនួនពីរដែលស្ថិតនៅក្រោមការហ៊ុមព័ទ្ធ។ លោក Stephane Dujarric អ្នកនាំពាក្យរបស់អគ្គលេខាធិការអង្គការសហប្រជាជាតិបាននិយាយថា «យើងចូលរួមជាមួយឧត្តមស្នងការសិទ្ធិមនុស្ស លោក Volker Turk ក្នុងការបង្ហាញការព្រួយបារម្ភចំពោះរបាយការណ៍ដែលថា ជនស៊ីវិលជាង៥០នាក់ត្រូវបានសម្លាប់នៅក្នុងការវាយប្រហារដោយយានដ្រូនធ្វើឡើងដោយភាគីជម្លោះនៅក្នុងប្រទេសស៊ូដង់ រយៈពេលពីរថ្ងៃក្នុងសប្តាហ៍នេះ»។

លោក Dujarric និយាយថា «ការសម្លាប់ចុងក្រោយបំផុត គឺជាការរំលឹកមួយផ្សេងទៀតអំពីការបាត់បង់ធ្ងន់ធ្ងរចំពោះជនស៊ីវិលពីការប្រើប្រាស់សង្គ្រាមយានដ្រូនដែលកំពុងកើនឡើងនៅក្នុងប្រទេសស៊ូដង់»។ «យើងបន្តការអំពាវនាវដល់ភាគីទាំងពីរឱ្យបញ្ឈប់អំពើហិង្សា និងចូលរួមក្នុងការសន្ទនាឈានទៅរកបទឈប់បាញ់»។

ការិយាល័យសម្របសម្រួលកិច្ចការមនុស្សធម៌របស់អង្គការសហប្រជាជាតិ (OCHA) បាននិយាយថា ក្បួនរថយន្តចំនួន២៦គ្រឿងដែលមានសម្ភារៈសង្គ្រោះជីវិតសម្រាប់មនុស្សជាង១៣០.០០០នាក់បានទៅដល់ទីក្រុង Dilling និងទីក្រុង Kadugli ក្នុងរដ្ឋ South Kordofan ជាការទៅដល់លើកដំបូងក្នុងរយៈពេលជាងបីខែមកនេះ។

អង្គការ OCHA បាននិយាយថា ក្បួនរថយន្តដែលដឹកនាំដោយកម្មវិធីស្បៀងអាហារពិភពលោក មូលនិធិកុមារអង្គការសហប្រជាជាតិ និងកម្មវិធីអភិវឌ្ឍន៍អង្គការសហប្រជាជាតិ ត្រូវបានពន្យារពេលជាច្រើនសប្តាហ៍មកហើយ ដោយសារតែកម្រិតអសន្តិសុខខ្ពស់នៅតាមផ្លូវ។