​បាល់ទាត់​៖ ​ខ្សែប្រយុទ្ធ​ស៊ុត​បញ្ចូល​ទី​ច្រើនជាងគេ​ឲ្យស៊ុយអែត Zlatan Ibrahimovic ​ត្រូវបាន​កោះហៅ​ត្រលប់​ឲ្យមកជួយ​ក្រុម​ជំរើសជាតិ​វិញ ៥ឆ្នាំ​បន្ទាប់ពី​ចូលនិវត្តន៍​។ ​​បុរស​វ័យ ៣៩ឆ្នាំ​រូបនេះ​ធ្លាប់​ស៊ុត​បញ្ចូល​ទី​បាន ៦២គ្រាប់​ក្នុងការ​បង្ហាញខ្លួន ១១២ប្រកួត​ឲ្យក្រុម​ជំរើសជាតិស៊ុយ​អែត មុនពេល​ចូលនិវត្តន៍​ក្រោយ​ធ្លាប់​ត្រឹម​វគ្គ​ចែក​ពូ​ល​នៅ Euro ២០១៦​។

​​ការសំរេចចិត្ត​កោះហៅ Zlatan មកវិញ​នេះ ស្របពេល​ស៊ុយអែត​ត្រៀមខ្លួន​ប្រកួត​វគ្គ​ជំ​រុះ World Cup ២០២២​។ ​​អ្នកចាត់ការ​ក្រុម​ជំរើសជាតិ​ស៊ុយអែត Janne Andersson ​បាន​បើក​ចំហរ​ក្នុង​ការវិល​ត្រលប់​មកវិញ​របស់ Zlatan Ibrahimovic ​បន្ទាប់ពី​មានការ​ជជែក​គ្នា​នៅ​ទីក្រុង Milan ប្រទេស​អ៊ីតាលី ខណៈ​អ្នក​ទាំង២ ​ក៏មាន​ទំនាក់ទំនង​ល្អ​នឹង​គ្នា​ដែរ ហើយ​កីឡាករ​វ័យ ៣៩ឆ្នាំ​រូបនេះ​ក៏​ធ្លាប់​និយាយ​ដែរ​ថា នឹង​អាច​វិល​មក​ក្រុម​ជំរើសជាតិ​ស៊ុយអែត​វិញ​នៅ​ថ្ងៃ​ណា​មួយ​។​

​​ស៊ុយអែត​នឹងត្រូវ​ជួប​ជាមួយ​ហ្ស​ក​ហ្ស៊ី និង​កូ​សូ​វ៉ូក្នុង​វគ្គ​ជំ​រុះ World Cup ចុងខែ​មីនា​នេះ ខណៈ​ស៊ុយអែត​ស្ថិតក្នុង​ពូ​ល E ក្នុងការ​ប្រកួត Euro ២០២០ ដែល​លើក​មក ២០២១ នេះ​ជាមួយអេ​ស្ប៉ា​ញ ប៉ូឡូញ និង​ស្លូ​វ៉ា​គី​។​ ​​វ័យ​ចំណាស់​ពិតមែន Zlatan Ibrahimovic ​នៅតែ​បន្ត​ការ​ស៊ុត​បញ្ចូល​ទី​ឥតឈប់ឈរ​ដោយ​រកបាន ១៤គ្រាប់​ក្នុងការបង្ហាញ​ខ្លួន ១៤លើក​ឲ្យ AC Milan ១៤លើក​រដូវ​កាល​នេះ​៕

​អត្ថបទ​៖​នាង សុភា​វុ​ធ