ក្នុងអំឡុងកិច្ចប្រជុំក្រុមប្រឹក្សាសន្តិភាពដែលទើបបង្កើតថ្មីរបស់លោកប្រធានាធិបតីអាមេរិក ដូណាល់ ត្រាំ កាលពីថ្ងៃព្រហស្បតិ៍ (១៩ កុម្ភៈ) មេបញ្ជាការនៃកងកម្លាំងរក្សាស្ថិរភាពតំបន់ហ្កាហ្សា បាននិយាយថា ប្រទេសចំនួន៥ បានប្តេជ្ញាចិត្តបញ្ជូនកងទ័ពរបស់ពួកគេដើម្បីចូលរួមកងកម្លាំងសន្តិសុខអន្តរជាតិសម្រាប់តំបន់ហ៊ុមព័ទ្ធមួយនេះ។

ឧត្តមសេនីយ៍ឯក Jasper Jeffers មេបញ្ជាការកងកម្លាំងស្ថិរភាពអន្តរជាតិ បាននិយាយថា «ប្រទេសចំនួនប្រាំដំបូង បានប្តេជ្ញាចិត្តផ្ដល់កងកម្លាំងឱ្យបម្រើការនៅក្នុងកងកម្លាំងសន្តិសុខអន្តរជាតិ (ISF) នោះគឺឥណ្ឌូនេស៊ី ម៉ារ៉ុក កាហ្សាក់ស្ថាន កូសូវ៉ូ និងអាល់បានី។ ប្រទេសចំនួនពីរ បានប្តេជ្ញាចិត្តបណ្តុះបណ្តាលកម្លាំងនគរបាល នោះគឺអេហ្ស៊ីប និងហ្ស៊កដានី»។

លោក Jeffers ក៏បាននិយាយផងដែរថា កងកម្លាំង ISF នឹងចាប់ផ្តើមដោយការដាក់ពង្រាយនៅភាគខាងត្បូងនៃតំបន់រ៉ាហ្វា របស់ដែនដីហ្កាហ្សា បណ្តុះបណ្តាលនគរបាលនៅទីនោះ និង «ពង្រីកផ្នែកនីមួយៗ»។ លោក Jeffers បាននិយាយថា ផែនការរយៈពេលវែងគឺប្រើប្រាស់កងទ័ព ISF ចំនួន ២ម៉ឺននាក់ និងបណ្តុះបណ្តាលនគរបាលចំនួន ១២.០០០នាក់។

កាលពីថ្ងៃព្រហស្បតិ៍ដដែលនោះ គណៈកម្មាធិការប៉ាឡេស្ទីនដែលគាំទ្រដោយអាមេរិក និងត្រូវបានបង្កើតឡើងដើម្បីគ្រប់គ្រងតំបន់ហ្កាហ្សាបន្តពីពួកសកម្មប្រយុទ្ធហាម៉ាស បានបើកទទួលពាក្យស្នើសុំសម្រាប់កម្លាំងនគរបាលនៅតំបន់ប៉ាឡេស្ទីនមួយនេះ។ លោក Nikolay Mladenov ប្រេសិតដែលត្រូវបានតែងតាំងដោយលោក Trump ក្នុងការត្រួតពិនិត្យការសម្របសម្រួលក្រោយសង្គ្រាមនៅតំបន់ហ្កាហ្សា បានប្រាប់កិច្ចប្រជុំក្រុមប្រឹក្សាសន្តិភាពថា ជនជាតិប៉ាឡេស្ទីនប្រមាណ ២ពាន់នាក់ បានចុះឈ្មោះចូលរួមកម្លាំងនគរបាលនេះរួចទៅហើយ ក្នុងប៉ុន្មានម៉ោងដំបូងបន្ទាប់ពីការបើកទទួលពាក្យស្នើសុំ៕