កាលពីថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) នៅក្នុងសុន្ទរកថាក្រោយការបោះឆ្នោតលើកដំបូងរបស់លោកស្រីទៅកាន់សភា នាយករដ្ឋមន្ត្រីជប៉ុន លោកស្រី Sanae Takaichi បានព្រមានអំពី «ការសម្លុតកំហែង » កាន់តែខ្លាំងឡើងៗរបស់ប្រទេសចិន ហើយបានសន្យាថា នឹងធ្វើការរុះរើយុទ្ធសាស្ត្រការពារជាតិ សម្រាលការរឹតបន្តឹងលើការនាំចេញយោធា និងពង្រឹងខ្សែច្រវាក់ផ្គត់ផ្គង់សំខាន់ៗ។

អាណត្តិរយៈពេល ៤ខែរបស់លោកស្រី Takaichi ត្រូវបានកត់សម្គាល់ដោយការមានជម្លោះការទូតជាមួយប្រទេសចិន បន្ទាប់ពីលោកស្រីបានលើកឡើងថា ជប៉ុនអាចដាក់ពង្រាយកម្លាំងយោធា ដើម្បីទប់ទល់នឹងការវាយប្រហារណាមួយលើកោះតៃវ៉ាន់ ដែលក៏គំរាមកំហែងដល់ទឹកដីជប៉ុនផងដែរ។

បន្ទាប់ពីប្រែក្លាយសំឡេងភាគច្រើនដ៏ផុយស្រួយទៅជាជ័យជម្នះដ៏លើសលប់ នៅក្នុងការបោះឆ្នោតសភាជាន់ទាបនៅខែនេះ លោកស្រី Takaichi បានគូសបញ្ជាក់ពីរបៀបវារៈមួយដែលមានគោលបំណងទប់ទល់នឹងអ្វីដែលលោកស្រីមើលឃើញថា ជាការគំរាមកំហែងផ្នែកសេដ្ឋកិច្ច និងសន្តិសុខកាន់តែខ្លាំងឡើងៗពីចិន និងដៃគូក្នុងតំបន់របស់ខ្លួន។

លោកស្រី Takaichi បាននិយាយថា «ប្រទេសជប៉ុនប្រឈមនឹងបរិយាកាសសន្តិសុខដ៏ធ្ងន់ធ្ងរ និងស្មុគស្មាញបំផុតជាលើកដំបូង ចាប់តាំងពីសង្គ្រាមលោកលើកទី២» ដោយលោកស្រីចង្អុលទៅសកម្មភាពយោធាដែលកំពុងរីកធំឡើងៗរបស់ចិន ទំនាក់ទំនងសន្តិសុខកាន់តែជិតស្និទ្ធជាមួយរុស្ស៊ីរបស់ទីក្រុងប៉េកាំង និងសមត្ថភាពមីស៊ីលនុយក្លេអ៊ែរដែលកាន់តែលេចធ្លោឡើងរបស់កូរ៉េខាងជើង។

ជាមួយគ្នានេះ លោកស្រីបានបន្ថែមថា រដ្ឋាភិបាលនឹងកែសម្រួលឯកសារសន្តិសុខស្នូលចំនួន ៣ របស់ប្រទេសជប៉ុននៅឆ្នាំនេះ ដើម្បីបង្កើតយុទ្ធសាស្ត្រការពារជាតិថ្មីមួយ ហើយនឹងពន្លឿនការពិនិត្យឡើងវិញនូវច្បាប់នាំចេញយោធា ដើម្បីពង្រីកការលក់នៅក្រៅប្រទេស និងពង្រឹងក្រុមហ៊ុនការពារជាតិ។ លោកស្រី Takaichi បានពន្លឿនពង្រឹងវិស័យយោធាដែលបានចាប់ផ្តើមនៅឆ្នាំ២០២៣ ដែលនឹងបង្កើនការចំណាយការពារជាតិរបស់ជប៉ុនទ្វេដងដល់ ២ភាគរយនៃផលិតផលក្នុងស្រុកសរុប (GDP) នៅចុងខែមីនា ដោយធ្វើឲ្យខ្លួនក្លាយជាប្រទេសមួយ ក្នុងចំណោមប្រទេសដែលចំណាយយោធាច្រើនជាងគេបំផុតរបស់ពិភពលោក ទោះបីជាមានរដ្ឋធម្មនុញ្ញសន្តិភាពនិយមក៏ដោយ៕