សារព័ត៌មាន Yonhap News បានរាយការណ៍ថា យន្តហោះចម្បាំងអាមេរិក និងចិន បានប្រឈមមុខគ្នាមួយភ្លែត នៅលើផ្ទៃទឹក ក្បែរឧបទ្វីបកូរ៉េ ក្នុងសប្តាហ៍នេះ ដែលជាការប្រឈមមុខដាក់គ្នាដ៏កម្រមួយ នៅក្នុងតំបន់នោះ រវាងមហាអំណាចទាំង២។

យន្តហោះចម្បាំងអាមេរិកប្រហែល ១០គ្រឿង បានចាកចេញពីមូលដ្ឋានទ័ពអាកាសមួយ ក្នុងទីក្រុង Pyeongtaek កាលពីថ្ងៃទី១៨ ខែកុម្ភៈ សម្រាប់សមយុទ្ធនៅលើដែនទឹកអន្តរជាតិ នៅឆ្នេរភាគខាងលិចរបស់កូរ៉េខាងត្បូង។ នេះបើយោងតាមការចុះផ្សាយរបស់សារព័ត៌មាន ដោយដកស្រង់ប្រភពយោធាដែលមិនត្រូវបានបង្ហាញអត្តសញ្ញាណ។

យោងតាមសេចក្ដីរាយការណ៍នោះ បានឲ្យដឹងថា បើទោះបីយន្តហោះអាមេរិកមិនបានចូលទៅក្នុងតំបន់កំណត់អត្តសញ្ញាណការពារដែនអាកាសរបស់ប្រទេសចិនក៏ដោយ ក៏ទីក្រុងប៉េកាំងបានប្រញាប់ប្រញាល់បញ្ចេញយន្តហោះនៅពេលដែលយន្តហោះទាំងនោះទៅកៀកតំបន់នោះ។

តំបន់កំណត់អត្តសញ្ញាណការពារដែនអាកាស ដែលមិនដូចនឹងដែនអាកាសស្ថិតក្រោមការត្រួតត្រារបស់ប្រទេសមួយ គឺជាតំបន់មួយដែលយន្តហោះត្រូវបានគេរំពឹងថា នឹងកំណត់អត្តសញ្ញាណខ្លួនឯង នៅពេលដែលពួកវាទៅកៀកនឹងតំបន់នោះ។

កងកម្លាំងអាមេរិកនៅកូរ៉េខាងត្បូង ដែលត្រួតពិនិត្យកងទ័ពអាមេរិកប្រហែល ២៨.៥០០នាក់ដែលឈរជើងនៅកូរ៉េខាងត្បូង មិនបានឆ្លើយតបភ្លាមៗនៅពេលដែលសារព័ត៌មាន Bloomberg News ទាក់ទងសុំការអត្ថាធិប្បាយ។ ហើយក្រសួងការបរទេសចិនមិនបានឆ្លើយតបនោះដែរទៅនឹងការស្នើសុំការអត្ថាធិប្បាយដែលធ្វើឡើងនៅខាងក្រៅម៉ោងធ្វើការ។ ចំណែកក្រសួងការពារជាតិកូរ៉េខាងត្បូង បានឲ្យដឹងថា ខ្លួនមិនអាចបញ្ជាក់ពីប្រតិបត្តិការយោធារបស់សហរដ្ឋអាមេរិកបានទេ៕