ជនជាតិប៉ាឡេស្ទីនជាង ៧៥.០០០នាក់ ត្រូវបានសម្លាប់ក្នុងរយៈពេល ១៥ខែដំបូងនៃការវាយប្រហារដោយយោធារបស់អ៊ីស្រាអែល នៅតំបន់ហ្កាហ្សា ដែលជាតួលេខខ្ពស់ជាងការស្លាប់ចំនួន ៤៩.០០០នាក់ដែលមន្ត្រីសុខាភិបាលក្នុងតំបន់បានប្រកាសនាពេលនោះ។ នេះបើយោងតាមការសិក្សាថ្មីមួយដោយទស្សនាវដ្តីវេជ្ជសាស្ត្រ The Lancet Global Health។

ការសិក្សាពិនិត្យដោយអ្នកជំនាញ ដែលបានចេញផ្សាយកាលពីថ្ងៃទី១៨ ខែកុម្ភៈ បានរកឃើញថា ស្ត្រី កុមារ និងមនុស្សចាស់ មានចំនួនប្រហែល ៥៦,២ភាគរយនៃការស្លាប់ដោយហិង្សានៅតំបន់ហ្កាហ្សា ក្នុងអំឡុងពេលនោះ ជាកម្រិតមួយដែលការសិក្សាបានលើកឡើងថា ស្រដៀងនឹងរបាយការណ៍របស់ក្រសួងសុខាភិបាលតំបន់ហ្កាហ្សា។

ការសិក្សានេះ គឺជាការស្ទង់មតិប្រជាជនឯករាជ្យលើកដំបូង អំពីអត្រាមរណភាព នៅក្នុងតំបន់ហ្កាហ្សា។ នេះបើយោងតាមអ្នកនិពន្ធរបស់ការសិក្សា ដែលការស្រាវជ្រាវរបស់ពួកគេពាក់ព័ន្ធនឹងការស្ទង់មតិគ្រួសារប៉ាឡេស្ទីន ចំនួន ២.០០០គ្រួសារ ក្នុងរយៈពេល ៧ថ្ងៃ ដោយចាប់ផ្តើមនៅថ្ងៃទី៣០ ខែធ្នូ ឆ្នាំ២០២៤។

អ្នកនិពន្ធបានសរសេរថា៖ «ភស្តុតាងរួមបញ្ចូលគ្នា បង្ហាញថា គិតត្រឹមថ្ងៃទី៥ ខែមករា ឆ្នាំ២០២៥ ប្រជាជន ៣ ទៅ ៤ភាគរយនៃតំបន់ហ្កាហ្សា ត្រូវបានសម្លាប់ដោយហិង្សា ហើយមានចំនួនអ្នកស្លាប់ដោយអហិង្សាយ៉ាងច្រើនដែលបង្កឡើងដោយជម្លោះនេះដោយប្រយោល»។

ចំនួនអ្នកស្លាប់នៅហ្កាហ្សា ត្រូវបានជជែកវែកញែកយ៉ាងខ្លាំងក្លា ចាប់តាំងពីការវាយប្រហាររបស់អ៊ីស្រាអែល បានចាប់ផ្តើមបន្ទាប់ពីមានការវាយប្រហាររបស់ហាម៉ាស កាលពីថ្ងៃទី៧ ខែតុលា ឆ្នាំ២០២៣ ទៅលើភាគខាងត្បូងអ៊ីស្រាអែល។ អាជ្ញាធរសុខាភិបាលតំបន់ហ្កាហ្សា ដែលតួលេខរបស់ពួកគេត្រូវបានអង្គការសហប្រជាជាតិចាត់ទុកថា អាចទុកចិត្តបានជាយូរមកហើយនោះ បានរាយការណ៍ថា មានមនុស្សជាង ៧២.០០០នាក់ ត្រូវបានសម្លាប់ ហើយប៉ាន់ប្រមាណថា មានមនុស្សរាប់ពាន់នាក់ទៀតនៅតែមិនទាន់ស្វែងរកឃើញ នៅក្រោមអគារដែលត្រូវបានបំផ្លាញ ២៨ខែក្រោយមក៕