ប្រណាំងម៉ូតូ៖ កីឡាករសញ្ជាតិព័រទុយហ្កាល់ Miguel Oliveira បានប្រជែងឈ្នះការប្រណាំងម៉ូតូ GP ពិភពលោកនៅទឹកដីឥណ្ឌូនេស៊ីកាលពីថ្ងៃអាទិត្យ ខណៈដែលកីឡាករអេស្ប៉ាញ Marc Marquez ដួលមួយទំហឹងពេលកម្ដៅសាច់ដុំ។
កីឡាករជើងឯកពិភពលោក ៦សម័យរូបនេះបានដួលខ្ទាតចេញពីម៉ូតូរបស់ខ្លួននៅផ្លូវបត់ទី៧ នៃទីលានហោះធ្លាក់មកលើដីពេញទំហឹងតែសំណាងល្អមិនមានគ្រោះថ្នាក់អ្វីធ្ងន់ធ្ងរ គ្រាន់តែអាក់ខានមិនបានចូលរួមការប្រណាំងផ្លូវការ។ គណៈកម្មការរៀបចំបានសម្រេចកាត់បន្ថយមកប្រណាំងពី ២៧ជុំមកត្រឹម ២០ជុំដោយសារព្រួយបារម្ភពីបញ្ហាទីលានដែលមានកម្ដៅខ្លាំងដល់ទៅ ៤៣អង្សារ ស្របពេលដែលការប្រកួតទៀតសោតត្រូវបានរំខានដោយសារភ្លៀងធ្លាក់ខ្លាំង។ កីឡាកររបស់ក្រុម KTM, Miguel Oliveira បានប្រជែងឈ្នះការប្រកួតនេះនៅ ចំពោះមុខអ្នកការពារតំណែងជើងឯកកីឡាករបារាំង Fabio Quartararo និងលេខ៣ ក៏ជាកីឡាករបារាំងដែរគឺ Johann Zarco។
សូមបញ្ជាក់ថា នេះជាលើកដំបូងប៉ុណ្ណោះសំរាប់ឥណ្ឌូនេស៊ីដែលរៀបចំការប្រកួតម៉ូតូ GP បន្ទាប់ពីអាក់ខានអស់រយៈពេល ២៥ឆ្នាំមកហើយ។ រដូវកាល ២០២២ នេះប្រណាំងបាន ២ទីលានហើយបន្ទាប់ពីកាតា និងឥណ្ឌូនេស៊ីនេះម៉ូតូ GP នឹងបន្តដំណើរទៅទីលានទី៣ នៅប្រទេសអាហ្សង់ទីនដើមខែក្រោយ៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
