គ្រួសាររបស់ជនជាតិកេនយ៉ាដែលរងការចោទប្រកាន់ថា ត្រូវបានគេប្រើល្បិច ដើម្បីចូលរួមប្រយុទ្ធឲ្យរុស្ស៊ីនៅអ៊ុយក្រែននោះ បានទាមទារការវិលត្រឡប់មកវិញមនុស្សជាទីស្រលាញ់របស់ពួកគេ ស្របពេលដែលរបាយការណ៍ចារកម្មផ្លូវការបង្ហាញថា ពលរដ្ឋកេនយ៉ាងជាង ១ពាន់នាក់ ត្រូវបានគេល្បួងនាំយកទៅប្រយុទ្ធនៅជួរមុខ ។

យោងតាមរបាយការណ៍ចារកម្មរបស់ប្រទេសកេនយ៉ាដែលបានបង្ហាញដល់សមាជិកសភា បានឲ្យដឹងថា ជនជាតិកេនយ៉ាជាង ១ពាន់នាក់ ត្រូវបានជ្រើសរើសឲ្យចូលរួមប្រយុទ្ធនៅខាងភាគីរុស្ស៊ីក្នុងសង្គ្រាមនៅប្រទេសអ៊ុយក្រែន ដែលច្រើនជាងការប៉ាន់ស្មានរបស់អាជ្ញាធរដល់ទៅប្រាំដង ។

ទោះបីជាយ៉ាងណាក៏ដោយ ស្ថានទូតរុស្ស៊ីប្រចាំនៅទីក្រុង Nairobi កាលពីថ្ងៃព្រហស្បតិ៍ បានបដិសេធថា ទីក្រុងមូស្គូ ពុំមានជាប់ពាក់ព័ន្ធទៅនឹងការជ្រើសរើសជនជាតិកេនយ៉ាដោយខុសច្បាប់ឲ្យចូលប្រយុទ្ធនៅអ៊ុយក្រែននោះទេ ទោះបីជាខ្លួនបាននិយាយថា ពលរដ្ឋបរទេសអាចចូលរួមដោយស្ម័គ្រចិត្ត ជាមួយកងកម្លាំងប្រដាប់អាវុធរបស់ពួកគេក៏ដោយ។

មនុស្សរាប់សិបគ្រួសារនាំគ្នាតវ៉ានៅទីក្រុង Nairobi កាលពីថ្ងៃព្រហស្បតិ៍ ទាមទារឲ្យរដ្ឋាភិបាលចាត់វិធានការ រយៈពេល ១ថ្ងៃប៉ុណ្ណោះ ក្រោយសេវាចារកម្មជាតិប្រទេសមួយនេះ បញ្ចេញរបាយការណ៍លើករណីឆបោក ។

អ្នកស្រី Winnie Rose Wambui មានសាច់ញាតិទៅប្រទេសរុស្ស៊ី និយាយថា អ្នកស្រីសង្ឃឹមថានឹងទទួលបានព័ត៌មានពីប្អូនប្រុស Samuel Maina របស់គាត់ ដែលបានទៅរុស្ស៊ី ពេលជឿថា គាត់នឹងមានការងារធ្វើជាសន្តិសុខនៅផ្សារទំនើប ។ 

អ្នកស្រីនិយាយប្រាប់ទីភ្នាក់ងារព័ត៌មាន APថា អ្នកស្រីបាត់ដំណឹងប្អូនប្រុសគាត់កាលពីខែតុលា ឆ្នាំមុន ពេលដែលគាត់ផ្ញើរសំឡេងឈឺចាប់ចេញពីព្រៃ ៕