ក្បួនជំនួយមនុស្សធម៌អន្តរជាតិ សម្រាប់ប្រទេសគុយបាដែលកំពុងតស៊ូនឹងវិបត្តិសេដ្ឋកិច្ចកាន់តែអាក្រក់ទៅៗ ដោយសារការបិទខ្ទប់ប្រេងដែលដាក់ដោយទីក្រុងវ៉ាស៊ីនតោន នឹងទៅដល់ទីក្រុងឡាហាវ៉ាន (Havana) នៅថ្ងៃទី២១ ខែមីនា ឆ្នាំ២០២៦។ នេះបើយោងតាមក្រុមអ្នករៀបចំ ដែលបានប្រាប់ឲ្យដឹងកាលពីថ្ងៃព្រហស្បតិ៍ (ទី១៩ ខែកុម្ភៈ)។

ក្រុមអ្នករៀបចំ គឺអង្គការ Nuestra America Convoy to Cuba ឲ្យដឹងថា ពួកគេនឹងដឹកជញ្ជូនជំនួយតាមផ្លូវអាកាស ផ្លូវគោក និងផ្លូវទឹកទៅកាន់ប្រទេសកោះកុម្មុយនីស្តមួយនេះ ដែលប្រឈមនឹងការធ្លាក់ចូលទៅក្នុងភាពងងឹតទាំងស្រុង ចាប់តាំងពីប្រធានាធិបតីអាមេរិក លោក Donald Trump បានសន្យាថា នឹងធ្វើឲ្យប្រទេសខ្វះខាតប្រេងប្រើប្រាស់ កាលពីខែមករា។

ក្រុមនេះបានឲ្យដឹងនៅក្នុងសេចក្តីថ្លែងការណ៍ថា «ក្បួនជំនួយនេះនឹងដឹកជញ្ជូនអាហារ ថ្នាំពេទ្យ សម្ភារៈវេជ្ជសាស្ត្រ និងទំនិញចាំបាច់ដែលត្រូវការជាបន្ទាន់ ទៅកាន់សហគមន៍ដែលប្រឈមនឹងការខ្វះខាតយ៉ាងខ្លាំង ដោយសារការឡោមព័ទ្ធកាន់តែខ្លាំងឡើងៗរបស់សហរដ្ឋអាមេរិក ដែលបានរំខានដល់ការនាំចូលប្រេងឥន្ធនៈ ផ្អាកការហោះហើរ ហើយធ្វើឲ្យមន្ទីរពេទ្យ និងសេវាសំខាន់ៗជួបបញ្ហាធ្ងន់ធ្ងរ»។

ក្រុមនេះពណ៌នាអំពីខ្លួនឯងថា ជាសម្ព័ន្ធភាពអន្តរជាតិ ដែលមានសហជីព សមាជិកសភា អង្គការមនុស្សធម៌ និងឥស្សរជនសាធារណៈ ក្នុងនោះរួមមានទាំងសកម្មជនស៊ុយអែត នាង Greta Thunberg ផងដែរ ដែលត្រូវបានបណ្តេញចេញពីអ៊ីស្រាអែល ក្នុងឆ្នាំ២០២៥ បន្ទាប់ពីព្យាយាមឡើងលើកងនាវាដែលមានជំនួយឆ្ពោះទៅកាន់តំបន់ហ្កាហ្សា៕