ស្ថាប័នគ្រប់គ្រងបាល់ទាត់ពិភពលោក ហៅកាត់ថា FIFA (សហព័ន្ធកីឡាបាល់ទាត់អន្តរជាតិ) និងក្រុមប្រឹក្សាសន្តិភាព (Board of Peace) កាលពីថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) បានចុះហត្ថលេខាលើកិច្ចព្រមព្រៀងភាពជាដៃគូ ដើម្បីទាក់ទាញការវិនិយោគពីថ្នាក់ដឹកនាំ និងស្ថាប័ននានា នៅលើពិភពលោក ដើម្បីការអភិវឌ្ឍប្រកបដោយចីរភាពនៅក្នុងតំបន់ដែលរងផលប៉ះពាល់ដោយជម្លោះ តាមរយៈវិស័យបាល់ទាត់។

ក្រុមប្រឹក្សាសន្តិភាព ដែលបង្កើតឡើងក្រោមការគ្រប់គ្រងរបស់លោកប្រធានាធិបតីអាមេរិក Donald Trump បានបើកកិច្ចប្រជុំផ្លូវការលើកដំបូងរបស់ខ្លួន ដោយផ្តោតលើមូលនិធិកសាងឡើងវិញ នៅតំបន់ហ្កាហ្សា ដែលមានគោលបំណងកសាងដែនដីនេះឡើងវិញ នៅពេលដែលក្រុមហាម៉ាសរំសាយអាវុធ។

ការរំសាយអាវុធរបស់ក្រុមហាម៉ាស និងការដកកងទ័ពអ៊ីស្រាអែល ទំហំនៃមូលនិធិកសាងឡើងវិញ និងការមានលំហូរជំនួយមនុស្សធម៌ទៅកាន់ប្រជាជនដែលរងការបំផ្លិចបំផ្លាញដោយសង្គ្រាម ត្រូវបានគេរំពឹងថា នឹងបង្កបញ្ហាប្រឈមយ៉ាងធំដល់ប្រសិទ្ធភាពរបស់ក្រុមប្រឹក្សាភិបាលនេះ នៅក្នុងប៉ុន្មានខែខាងមុខ។

FIFA បានឲ្យដឹងថា ផែនការសហការរបស់ FIFA រួមមានការសាងសង់ទីលានតូចៗចំនួន ៥០ នៅជិតសាលារៀន និងតំបន់លំនៅឋាន នៅក្នុងតំបន់ហ្កាហ្សា ទីលានស្តង់ដារចំនួន ៥ នៅទូទាំងតំបន់ជាច្រើន សាលាបង្ហាត់បាល់ទាត់ទំនើបរបស់ FIFA និងពហុកីឡដ្ឋានជាតិថ្មីដែលមានចំណុះផ្ទុក ២០.០០០កៅអី។ លោក Trump បាននិយាយថា FIFA នឹងរៃអង្គាសប្រាក់ ៧៥លានដុល្លារអាមេរិក សម្រាប់គម្រោងទាក់ទងនឹងបាល់ទាត់ នៅតំបន់ហ្កាហ្សា។

ប្រមុខ FIFA លោក Gianni Infantino បានលើកឡើងនៅក្នុងសេចក្តីថ្លែងការណ៍មួយថា៖ «ថ្ងៃនេះ FIFA និងក្រុមប្រឹក្សាសន្តិភាព បានចុះហត្ថលេខាលើកិច្ចព្រមព្រៀងភាពជាដៃគូដ៏សំខាន់មួយ ដែលនឹងជំរុញការវិនិយោគលើវិស័យបាល់ទាត់ ដើម្បីជួយដល់ដំណើរការស្តារឡើងវិញ នៅក្នុងតំបន់ក្រោយជម្លោះ»៕