យោងតាមការអះអាងរបស់បណ្តាញគ្រូពេទ្យស៊ូដង់ បានឲ្យដឹងថា កម្មករជំនួយយ៉ាងហោច ៣នាក់ ត្រូវបានសម្លាប់ និងមនុស្ស ៤នាក់ផ្សេងទៀត បានរងរបួស នៅក្នុងការវាយប្រហារយានដ្រូនរបស់កងកម្លាំងគាំទ្ររហ័ស(RSF) លើក្បួនរថយន្តដឹកជំនួយនៅរដ្ឋ South Kordofan ប្រទេសស៊ូដង់ ដែលជាការសម្លាប់រង្គាលចុងក្រោយគេលើជនស៊ីវិលនៅក្នុងសង្រ្គាមដ៏ឃោឃៅរបស់ប្រទេសមួយនេះ ។

ក្បួនរថយន្តដឹកជំនួយ និងគ្រឿងផ្គត់ផ្គង់មនុស្សធម៌ បានក្លាយជាគោលដៅវាយប្រហាររបស់កងកម្លាំង RSFនិងសម្ព័ន្ធមិត្តរបស់ពួកគេ គឺចលនារំដោះប្រជាជនស៊ូដង់ ខណៈពេលដែលពួកគេធ្វើដំណើរឆ្លងកាត់តំបន់ Kartala តាមផ្លូវទៅកាន់ទីក្រុង Kadugli និងទីក្រុង Dilling កាលពីថ្ងៃព្រហស្បតិ៍ ។

បណ្តាញគ្រូពេទ្យស៊ូដង់ បានធ្វើការថ្កោលទោសយ៉ាងខ្លាំងក្លាចំពោះការវាយប្រហារដោយចេតនាលើក្បួនរថយន្តមនុស្សធម៌ ដោយពួកគេចាត់ទុកថា វាគឺជាការបំពានយ៉ាងធ្ងន់ធ្ងរលើច្បាប់មនុស្សធម៌អន្តរជាតិ និងច្បាប់ទាំងអស់ដែលហាមប្រាមការវាយប្រហារលើកម្មករមនុស្សធម៌ ។

ការវាយប្រហារនេះដែរ គឺជាឧបទ្ទេវហេតុលើកទី ២ ក្នុងរយៈពេលតិចជាង ១ខែ បន្ទាប់ពីការផ្លោងគ្រាប់កាំភ្លើងធំលើក្បួនរថយន្តអង្គការសហប្រជាជាតិនៅទីក្រុង Al-Rahad ។

ក្រុមបណ្តាញគ្រូពេទ្យស៊ូដង់ បានបញ្ជាក់ជាថ្មីម្តងទៀតពីការអំពាវនាវរបស់ពួកគេដល់សហគមន៍អន្តរជាតិ អង្គការសហប្រជាជាតិ និងអង្គការមនុស្សធម៌ ឲ្យដាក់សម្ពាធលើថ្នាក់ដឹកនាំកងកម្លាំង RSF ដើម្បីធានាដល់ការការពារក្បួនរថយន្តដឹកជំនួយ និងកម្មកររបស់ពួកគេ ក៏ដូចជាបើកច្រករបៀងសុវត្ថិភាព និងប្រកបដោយនិរន្តរភាព ហើយនិងធ្វើឲ្យអ្នកនៅពីក្រោយគោលដៅ ទទួលខុសត្រូវទោសកំហុសរបស់ពួកគេ ៕