ប្រជាជនកូឡុំប៊ីរាប់ពាន់នាក់ បាននាំគ្នាចេញតាមដងផ្លូវ កាលពីថ្ងៃព្រហស្បតិ៍ (ទី១៩ ខែកុម្ភៈ ឆ្នាំ២០២៦) ជាការជួបជុំ និងការដង្ហែក្បួនជាបន្តបន្ទាប់ដែលអំពាវនាវដោយប្រធានាធិបតី លោក Gustavo Petro។

បាតុកម្មទាំងនេះ គឺជាការឆ្លើយតបទៅនឹងសេចក្តីសម្រេចថ្មីៗនេះរបស់ក្រុមប្រឹក្សារដ្ឋ គឺតុលាការរដ្ឋបាលខ្ពស់បំផុតរបស់ប្រទេសកូឡុំប៊ី ដែលបានផ្អាកជាបណ្ដោះអាសន្ននូវការដំឡើងប្រាក់ឈ្នួលអប្បបរមាដ៏ច្រើន ២៣,៧ភាគរយរបស់រដ្ឋាភិបាល ដែលត្រូវបានប្រកាសដំបូងនៅក្នុងខែធ្នូឆ្នាំមុន។

បើទោះបីរដ្ឋធានី Bogota បានក្លាយជាចំណុចកណ្តាលនៃភាពចលាចលក៏ដោយ ក៏ការតវ៉ាត្រូវបានរៀបចំឡើងនៅក្នុងទីក្រុងសំខាន់ៗផ្សេងទៀតផងដែរ ដែលរួមមាន Cali, Medellin និង Barranquilla។ នៅទីក្រុង Bogota ទំហំនៃការតវ៉ា បាននាំឲ្យមានការរំខានយ៉ាងខ្លាំង នៅពេលដែលក្រុមបាតុករបានបិទផ្លូវធំៗ ដែលបង្ខំឲ្យមានការផ្អាកប្រព័ន្ធដឹកជញ្ជូនសាធារណៈ និងធ្វើឲ្យអ្នកធ្វើដំណើរជាប់ទៅណាមិនរួច ជាភាពវឹកវរខាងចរាចរណ៍យ៉ាងទូលំទូលាយ។

នៅរសៀលថ្ងៃនោះ ការដង្ហែក្បួនផ្សេងៗបានប្រមូលផ្តុំគ្នា នៅឯទីលានប្រវត្តិសាស្ត្រ Plaza de Bolivar ជាកន្លែងដែលសហជីព សមាគមកម្មករ និងតំណាងមកពីសហគមន៍ជនជាតិដើមភាគតិច និងជនជាតិភាគតិចកូឡុំប៊ីដើមកំណើតអាហ្វ្រិក (Afro-Colombian) បានទៅជួបជុំគ្នា។

អំឡុងពេលនិយាយទៅកាន់ក្រុមបាតុករជាច្រើនមកពីកណ្តាលរដ្ឋធានី លោក Petro បានប្រកាន់ជំហររឹងមាំប្រឆាំងនឹងការផ្អាករបស់តុលាការ។ លោកបានប្រកាសថា រដ្ឋបាលរបស់លោកនឹងរក្សាប្រាក់ឈ្នួលអប្បបរមាចំនួន ២លានប៉េសូ (ប្រហែល ៥៤៤ដុល្លារ) ជាតួលេខច្បាស់លាស់ដែលបានកំណត់នៅក្នុងក្រឹត្យកាលពីខែធ្នូ៕