ការស៊ើបអង្កេតឯករាជ្យរបស់អង្គការសហប្រជាជាតិ(UN) បាននិយាយនៅក្នុងរបាយការណ៍ថ្មីរបស់ខ្លួនកាលពីថ្ងៃព្រហស្បតិ៍ថា ការសម្លាប់ទ្រង់ទ្រាយធំលើសហគមន៍មិនមែនអារ៉ាប់ ពេលដែលកងកម្លាំងគំាទ្ររហ័ស(RSF) ដណ្តើមបានទីក្រុង al-Fashir គឺជាសញ្ញាមួយនៃអំពើប្រល័យពូជសាសន៍ ។

ទីក្រុង El-Fasher គឺជាតំបន់កាន់កាប់ចុងក្រោយគេរបស់កងទ័ពស៊ូដង់នៅក្នុងតំបន់ Darfur ស្ថិតនៅភាគខាងលិចប្រទេស រហូតដល់ទីក្រុងមួយនេះ ធ្លាក់ទៅក្នុងកណ្តាប់ដៃរបស់កងកម្លាំង RSF កាលពីចុងខែតុលា ឆ្នាំមុន ។ ភាគីទាំង ២ កំពុងប្រយុទ្ធនៅក្នុងសង្រ្គាមស៊ីវិលដ៏ឃោឃៅ ចាប់តាំងពីខែមេសា ឆ្នាំ ២០២៣រហូតមក ។

ក្នុងរបាយការណ៍ថ្មីកាលពីថ្ងៃព្រហស្បតិ៍នេះ បេសកកម្មស្វែងរកការពិតអន្តរជាតិឯករាជ្យនៅស៊ូដង់ និយាយថា យុទ្ធជនកងកម្លាំង RSF ជាអ្នកនៅពីក្រោយអំពើឃោឃៅ ក្រោយការឡោមព័ទ្ធអស់រយៈពេល ១៨ខែលើទីក្រុង El-Fasher អំឡុងពេលដែលពួកគេដាក់លក្ខខណ្ឌឲ្យកម្ទេចចោលសហគមន៍មិនមែនជាអារ៉ាប់ ជាពិសេសសហគមន៍ Zaghawa និងសហគមន៍ Fur ។

នៅជំនួបក្រុមប្រឹក្សាសន្តិសុខ UNកាលពីថ្ងៃព្រហស្បតិ៍ ក្រុមមន្រ្តីមនុស្សធម៌និយាយថា ស្ថានភាពរបស់ស្រ្តី និងក្មេងស្រី កាន់តែអាក្រក់ទៅខ្លាំង និងឆាប់រហ័ស ចាប់តាំងពីការប្រយុទ្ធគ្នាផ្ទុះឡើង កាលពីរយៈពេលជិត ៣ឆ្នាំមុន ។

លោកស្រី Edem Wosornu គឺជាមន្រ្តីជំនួយការជាន់ខ្ពស់មួយរូបរបស់ UN និយាយប្រាប់ក្រុមប្រឹក្សាថា អំពើហិង្សាលើស្រ្តី និងក្មេងស្រី បានឈានដល់កម្រិតគ្រោះថ្នាក់ ដោយរូបលោកទាមទារឲ្យមានវិធានការការពារអាយុជីវិតរបស់ពួកគេ ៕