ទីក្រុងគីវ បានឲ្យដឹងនៅថ្ងៃសុក្រ (ទី២០ ខែកុម្ភៈ ឆ្នាំ២០២៦) នេះ ថា មនុស្ស ១០នាក់ ត្រូវបានចាប់ខ្លួននៅក្នុងប្រទេសអ៊ុយក្រែន និងម៉ុលដាវី ដោយសង្ស័យថា រៀបចំគម្រោងធ្វើឃាតឥស្សរជននយោបាយជាន់ខ្ពស់អ៊ុយក្រែន តាមបញ្ជារបស់ទីក្រុងមូស្គូ ដោយទទួលបានប្រាក់ឈ្នួលរហូតដល់ ១០០.០០០ដុល្លារ។

នៅមុននេះ ទីក្រុងគីវបានចោទប្រកាន់រុស្ស៊ីដែលបានចូលឈ្លានពានអ៊ុយក្រែន កាលពី ៤ឆ្នាំមុនថា បានរៀបចំផែនការសម្លាប់មន្ត្រីជាន់ខ្ពស់ជាច្រើននាក់ ក្នុងនោះរួមទាំងប្រធានាធិបតីអ៊ុយក្រែន លោក Volodymyr Zelensky និងប្រធានសេវាស៊ើបការណ៍សម្ងាត់របស់អ៊ុយក្រែនផងដែរ។

អគ្គរដ្ឋអាជ្ញាអ៊ុយក្រែន លោក Ruslan Kravchenko បានឲ្យដឹងនៅក្នុងសេចក្តីថ្លែងការណ៍មួយថា៖ «ជាផ្នែកមួយនៃការងាររបស់ក្រុមស៊ើបអង្កេតរួមគ្នានៃមន្ត្រីអនុវត្តច្បាប់អ៊ុយក្រែន និងម៉ុលដាវី ក្រុមមួយដែលត្រូវបានរៀបចំឡើង ត្រូវបានលាតត្រដាងថា កំពុងរៀបចំផែនការសម្លាប់តាមការជួល លើពលរដ្ឋអ៊ុយក្រែន និងជនបរទេសល្បីៗ»។

លោក Kravchenko បាននិយាយថា មន្ត្រីអនុវត្តច្បាប់ បានធ្វើការស្វែងរកចំនួន ២០កន្លែង នៅទូទាំងប្រទេស និងរឹបអូសបានប្រាក់ អាវុធ និងគ្រឿងផ្ទុះ ហើយបានរកឃើញការមានទំនាក់ទំនងជាមួយអ្នកគ្រប់គ្រងរុស្ស៊ី។ សេចក្តីថ្លែងការណ៍នេះ បានឲ្យដឹងទៀតថា មនុស្ស ៧នាក់ត្រូវបានចាប់ខ្លួននៅក្នុងប្រទេសអ៊ុយក្រែន ក្នុងអំឡុងពេលមានការចូលឆ្មក់ ហើយ ៣នាក់ទៀត រួមទាំងអ្នករៀបចំយុទ្ធនាការនេះផងដែរ ត្រូវបានចាប់ខ្លួននៅម៉ុលដាវី។

ប្រទេសម៉ុលដាវី បានបញ្ជាក់ពីការស៊ើបអង្កេតរួមគ្នា នៅក្នុងសេចក្តីថ្លែងការណ៍នៅមុននេះ ចំពោះផែនការមួយដែលមានគោលបំណង «កម្ចាត់ឥស្សរជនសាធារណៈជាច្រើនរូបនៅអ៊ុយក្រែន»។ មិនមានការអត្ថាធិប្បាយភ្លាមៗឡើយពីទីក្រុងមូស្គូ ជុំវិញការអះអាងទាំងនេះ៕