ភ្នំពេញ ៖  ក្រុមវិចិត្រករខ្មែរជាច្រើនរូប និងមានការចូលរួមពីវិចិត្រករបរទេសដែលរស់នៅកម្ពុជា បានមកជួបជុំគ្នានៅរាជធានីភ្នំពេញ ដើម្បីគូរផ្ទាំងគំនូរបង្ហាញពីសោកនាដកម្ម ដែលបន្សល់ទុកដោយសង្គ្រាមព្រំដែនកម្ពុជា-ថៃកន្លងទៅ។ ផ្ទាំងគំនូរនេះស្ថិតលើទីតាំងសួនមុខវត្តបុទុមវតី រាជធានីភ្នំពេញ។ ដំណើរការចាប់ផ្ដើមពីថ្ងៃទី ២០ ខែកុម្ភៈ និងគ្រោងបញ្ចប់នៅថ្ងៃទី ៣ ខែមីនា ខាងមុខ។

​ក្រុមវិចិត្រករដែលមានទាំងខ្មែរ និងបរទេសរស់នៅកម្ពុជានឹងប្រើប្រាស់ជក់របស់ខ្លួនជាថ្មី ដើម្បីប្រាប់ទៅពិភពលោកពីសោកនាដកម្មដែលបន្សល់ទុកដោយសារសង្គ្រាមព្រំដែនជាមួយប្រទេស ថៃ។ ជាសង្គ្រាមដែលកម្ពុជា មិនមែនជាអ្នកបង្កហេតុ ហើយមិនមែនជាអ្វីដែលកម្ពុជា ជ្រើសរើសនោះទេ។ កម្ពុជាជ្រើសសន្តិភាព កម្ពុជាជ្រើសរើសការដោះស្រាយតាមផ្លូវច្បាប់ មិនដោយអាវុធនោះទេ។

ការគូរផ្ទាំងគំនូរសិល្បៈដើម្បីសន្តិភាព ដែលបង្ហាញពីស្លាកស្នាម ការខ្ទេចខ្ទាំ ភាពសោកសៅនិងភាពឈឺចាប់នេះ គឺជាការផ្ដួចផ្ដើមដោយលោក តាន់ គីមសួរ ដោយមានកិច្ចសហការដោយសហភាពសហព័ន្ធយុវជនកម្ពុជា។ ផ្ទាំងគំនូរនេះ គូរលើផ្ទាំងទំហំទទឹង ៥ម៉ែត្រ បណ្ដោយ៣៥ម៉ែត្រ ដើម្បីបង្ហាញជូនសាធារណៈជន ក៏ដូចជាបង្ហាញទៅកាន់ពិភពលោកពីអ្វីដែលបានកើតឡើងចំពោះកម្ពុជា បង្ហាញពីអ្វីដែលកម្ពុជាចង់បានគឺសុខសន្តិភាព។

លោក តាន់ គីមសួរ លើកឡើងថា ផ្ទាំងគំនូរនៅរាជធានីភ្នំពេញនេះ មានភាពលម្អិតជាងផ្ទាំងគំនូរនៅខេត្តសៀមរាប។ លោកថា ផ្ទាំងគំនូរនឹងចូលរួមប្រាប់ទៅកាន់ពិភពលោកបន្ថែមទៀត ពីអ្វីដែលកម្ពុជាបានរងគ្រោះ ក៏ដូចជាបង្ហាញពីអ្វីដែលកម្ពុជាចង់បានគឺសន្តិភាព។

លោក គង់ សុរិយា តំណាងសហភាពសហព័ន្ធយុវជនកម្ពុជា លើកឡើងដែរថា ការចូលរួមរបស់ ស.ស.យ.ក គឺដើម្បីលើកកម្ពស់ដល់ការរួបរួមជាតិ ការចូលរួមរបស់យុវជន និងការកសាងសង្គមដែលមានសន្តិភាព និងអភិវឌ្ឍន៍ដោយចីរភាព។ លោកលើកទឹកចិត្ត ឱ្យមានការចូលរួមផ្សព្វផ្សាយតាមបណ្ដាញសង្គមឱ្យបានផុសផុលដើម្បីប្រាប់ទៅកាន់ពិភពលោក។

ផ្ទាំងគំនូរនេះស្ថិតលើទីតាំងសួនមុខវត្តបុទុមវតី រាជធានីភ្នំពេញ។ ដំណើរការចាប់ផ្ដើមពីថ្ងៃទី ២០ ខែកុម្ភៈ និងគ្រោងបញ្ចប់នៅថ្ងៃទី ៣ ខែមីនា ខាងមុខ។ សាធារណៈជនអាចចូលរួមទស្សនាការគូររបស់វិចិត្រករ និងចូលរួមចែករំលែកផ្សព្វផ្សាយដែលកម្ពុជាបានរងគ្រោះ និងផ្សព្វផ្សាយពីសន្តិភាពដែលកម្ពុជាចង់បាន។ ការដោះស្រាយដោយប្រើប្រាស់ច្បាប់ ពុំមែនជាការដោះស្រាយដោយប្រើអាវុធនោះទេ៕

អត្ថបទ៖ គឹមហុក