ប្រធានាធិបតីសហរដ្ឋអាមេរិក លោក Donald Trump បានឆ្លើយតបដោយកំហឹងចំពោះសេចក្តីសម្រេចរបស់តុលាការកំពូលកាលពីថ្ងៃសុក្រថា លោកខ្វះអំណាចក្នុងការកំណត់ការដំឡើងពន្ធជាឯកតោភាគីលើការនាំចូល ដោយរិះគន់ចៅក្រមម្នាក់ៗខណៈលោកបានសន្យាថានឹងបន្តសង្គ្រាមពាណិជ្ជកម្មសកលដែលបានធ្វើឱ្យពិភពលោកស្ថិតក្នុងភាពវឹកវររយៈពេលមួយឆ្នាំមកនេះ។ ដោយនិយាយថា លោកមិនរាថយចំពោះអ្វីដែលលោកហៅដដែលៗថាជាសេចក្តីសម្រេចគួរឱ្យអស់សំណើច លោក Trump បានប្រកាសការដំឡើងពន្ធថ្មី១០%ភ្លាមៗលើការនាំចូលពីគ្រប់ប្រទេសទាំងអស់ បន្ថែមលើការដំឡើងពន្ធដែលមានស្រាប់ ហើយក្រោយមកបានចេញសេចក្តីប្រកាសដាក់ឱ្យចូលជាធរមាន។ ច្បាប់នេះអនុញ្ញាតឱ្យលោកដាក់ពន្ធរហូតដល់១៥% រយៈពេល១៥០ថ្ងៃ ទោះបីជាវាអាចប្រឈមនឹងបញ្ហាផ្លូវច្បាប់ក៏ដោយ។ សេចក្តីសម្រេចដ៏សំខាន់៦ទល់នឹង៣របស់តុលាការបានផ្អាកសម្ពាធដែលលោក Trump និងបេសកជនពាណិជ្ជកម្មរបស់លោកបានធ្វើជាមួយរដ្ឋាភិបាលបរទេសនៅឯតុចរចាដើម្បីកំណត់ជាថ្មីនូវទំនាក់ទំនងការទូត និងទីផ្សារសកល។

សេចក្តីសម្រេចនេះបានធ្វើឱ្យសន្ទស្សន៍ភាគហ៊ុនអាមេរិកកើនឡើងភ្លាមៗ មុនពេលបញ្ចប់ដោយកើនឡើងខ្ពស់បន្តិច ខណៈក្រុមអ្នកវិភាគបានព្រមានអំពីភាពច្របូកច្របល់ជាថ្មីនៅក្នុងទីផ្សារសកល ដោយពួកគេកំពុងរង់ចាំចំណាត់ការបន្ទាប់របស់លោក Trump។ ប៉ុន្មានម៉ោងបន្ទាប់ពីការចេញសេចក្តីសម្រេច លោក Trump បានចុះហត្ថលេខាលើក្រឹត្យមួយដើម្បីច្រានចោលជុំវិញការដំឡើងពន្ធដែលតុលាការបានលុបចោល ហើយលោកក៏បានចេញសេចក្តីប្រកាសមួយ ដាក់ការដំឡើងពន្ធ១០% លើទំនិញភាគច្រើនដែលនាំចូលទៅក្នុងសហរដ្ឋអាមេរិករយៈពេល១៥០ថ្ងៃ ដោយផ្តល់ការលើកលែងសម្រាប់តែទំនិញមួយចំនួន រួមមានរ៉ែសំខាន់ៗ លោហធាតុ និងផលិតផលថាមពល។ ការចេញសេចក្តីសម្រេចនេះ បានធ្វើឱ្យមានសំនួរអំពីកិច្ចព្រមព្រៀងពាណិជ្ជកម្មដែលបេសកជនរបស់លោក Trump បានចរចាក្នុងរយៈពេលប៉ុន្មានខែថ្មីៗនេះក្រោមការគំរាមដំឡើងពន្ធខ្ពស់។ វាបានបន្សល់ទុកឲ្យនៅចំហសម្រាប់ជោគវាសនារបស់លោក Trump នួវទឹកប្រាក់ចំនួន១៧៥ពាន់លានដុល្លារដែលប្រមូលបានពីក្រុមហ៊ុននាំចូលសហរដ្ឋអាមេរិកក្រោមអ្វីដែលតុលាការបាននិយាយថា ជាអំណានច្បាប់មិនត្រឹមត្រូវ របស់លោក។