រដ្ឋមន្ត្រីការបរទេសអ៊ីរ៉ង់ កាលពីថ្ងៃសុក្រ (ទី២០ ខែកុម្ភៈ ឆ្នាំ២០២៦) បាននិយាយថា សហរដ្ឋអាមេរិកមិនបានស្វែងរកឲ្យការចម្រាញ់សារធាតុអ៊ុយរ៉ានីញ៉ូមដល់កម្រិតសូន្យឡើយ អំឡុងកិច្ចចរចានុយក្លេអ៊ែរ ក្នុងសប្តាហ៍នេះ ហើយអ៊ីរ៉ង់ក៏មិនបានស្នើផ្អាកការចម្រាញ់នោះដែរ ដោយលោកបន្ថែមថា លោករំពឹងថា នឹងមានសេចក្តីព្រាងសំណើតបតវិញដែលនឹងរួចរាល់ក្នុងរង្វង់ប៉ុន្មានថ្ងៃខាងមុខនេះ។

ក្នុងបទសម្ភាសន៍មួយនៅលើបណ្តាញព័ត៌មានទូរទស្សន៍ខ្សែកាបអាមេរិក MS NOW រដ្ឋមន្ត្រីការបរទេសអ៊ីរ៉ង់ លោក Abbas Araghchi បានប្រាប់ថា៖ «យើងមិនបានស្នើសុំការផ្អាកណាមួយឡើយ ហើយភាគីអាមេរិកក៏មិនបានស្នើឲ្យការចម្រាញ់សារធាតុអ៊ុយរ៉ាញ៉ូមដល់កម្រិតសូន្យដែរ”។

លោកបានបន្តថា៖ «អ្វីដែលយើងកំពុងនិយាយឥឡូវនេះ គឺរបៀបធ្វើឲ្យប្រាកដថា កម្មវិធីនុយក្លេអ៊ែររបស់អ៊ីរ៉ង់ រួមទាំងការចម្រាញ់សារធាតុអ៊ុយរ៉ានីញ៉ូម គឺសន្តិភាព និងនឹងនៅតែសន្តិភាពជារៀងរហូត«។

លោក Araghchi បានបន្ថែមថា «វិធានការធ្វើឲ្យមានទំនុកចិត្ត» ទាំងផ្នែកបច្ចេកទេស និងនយោបាយ នឹងត្រូវអនុវត្ត ដើម្បីធានាថា កម្មវិធីនេះនឹងនៅតែសន្តិភាព ជាថ្នូរនឹងចំណាត់ការមួយចំនួន ពាក់ព័ន្ធនឹងទណ្ឌកម្ម ប៉ុន្តែលោកមិនបានផ្តល់ព័ត៌មានលម្អិតបន្ថែមឡើយ។

លោកមិនបានផ្តល់ពេលវេលាជាក់លាក់នោះទេ ជុំវិញសំណើតបតរបស់អ៊ីរ៉ង់ សម្រាប់បេសកជនអាមេរិកលោក Steve Witkoff និងលោក Jared Kushner ប៉ុន្តែលោកបានបញ្ជាក់ថា លោកជឿថា កិច្ចព្រមព្រៀងការទូតមួយ គឺស្ថិតនៅក្នុងរង្វង់នៃការសម្រេចបាន ហើយអាចសម្រេចបាន «ក្នុងរយៈពេលដ៏ខ្លី»។

កាលពីថ្ងៃព្រហស្បតិ៍ ប្រធានាធិបតីអាមេរិក លោក Donald Trump បានផ្តល់ពេលកំណត់ដល់ទីក្រុងតេអេរ៉ង់ចំនួន ១០-១៥ថ្ងៃ ដើម្បីឲ្យធ្វើកិច្ចព្រមព្រៀង ឬបើមិនដូច្នោះទេ ត្រូវប្រឈមនឹង «រឿងអាក្រក់ដ៏ពិតប្រាកដ» ស្របពេលមានការបង្កើនកម្លាំងយោធារបស់សហរដ្ឋអាមេរិក នៅតំបន់មជ្ឈិមបូព៌ា ជាអ្វីដែលបានជំរុញឲ្យមានក្ដីបារម្ភ អំពីការផ្ទុះសង្គ្រាមកាន់តែធំ៕