ដោយដកស្រង់ប្រភពពីមន្ទីរបញ្ចកោណ ដែលបាននិយាយក្នុងលក្ខខណ្ឌមិនបញ្ចេញឈ្មោះ សារព័ត៌មាន The New York Times បានរាយការណ៍កាលពីថ្ងៃសុក្រ (ទី២០ ខែកុម្ភៈ ឆ្នាំ២០២៦) ថា កងទ័ពអាមេរិករាប់រយនាក់ត្រូវបានដកចេញពីមូលដ្ឋានទ័ពអាកាស Al Udeid ក្នុងប្រទេសកាតា។

របាយការណ៍នេះក៏បានឲ្យដឹងផងដែរថា កងកម្លាំងត្រូវបានជម្លៀសចេញពីបារ៉ែន ជាកន្លែងដែលកងនាវាទី៥ របស់កងទ័ពជើងទឹកអាមេរិកស្ថិតនៅ។ កងកម្លាំងអាមេរិកនៅតែឈរជើង នៅមូលដ្ឋាននានា ក្នុងប្រទេសអ៊ីរ៉ាក់ ស៊ីរី គុយវ៉ែត អារ៉ាប៊ីសាអ៊ូឌីត ហ្ស៊កដានី និងអេមីរ៉ាតអារ៉ាប់រួម។

ការដកទ័ពនេះកំពុងត្រូវបានបកស្រាយថា ជាវិធានការបង្ការ ក្នុងអំឡុងពេលមានភាពតានតឹងកើនឡើង ពាក់ព័ន្ធនឹងលទ្ធភាពអាចមានការវាយប្រហាររបស់សហរដ្ឋអាមេរិកលើអ៊ីរ៉ង់ ដោយទីក្រុងតេអេរ៉ង់ ត្រូវបានគេរំពឹងថា នឹងឆ្លើយតបដោយការវាយប្រហារលើកងកម្លាំងអាមេរិក នៅក្នុងតំបន់។

ទីបញ្ជាការកណ្តាលរបស់យោធាអាមេរិក ដែលទទួលខុសត្រូវលើអ៊ីរ៉ង់ និងតំបន់ជុំវិញភាគច្រើន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

នៅក្នុងលិខិតមួយកាលពីថ្ងៃព្រហស្បតិ៍ ដែលផ្ញើទៅកាន់អគ្គលេខាធិការអង្គការសហប្រជាជាតិ (UN) ប្រធានបេសកកម្មអ៊ីរ៉ង់ប្រចាំ UN បានលើកឡើងថា ប្រសិនបើអ៊ីរ៉ង់ត្រូវបានវាយប្រហារនោះ «មូលដ្ឋាន ទីតាំង និងធនធានទាំងអស់របស់កងកម្លាំងអរិភាព នៅក្នុងតំបន់ នឹងក្លាយជាគោលដៅស្របច្បាប់» ហើយ «សហរដ្ឋអាមេរិកនឹងត្រូវទទួលខុសត្រូវទាំងស្រុង និងដោយផ្ទាល់ ចំពោះផលវិបាកដែលមិនអាចទាយទុកជាមុនបាន និងមិនអាចគ្រប់គ្រងបាន»។

មូលដ្ឋាន Al Udeid គឺជាមូលដ្ឋានយោធាធំបំផុតរបស់សហរដ្ឋអាមេរិក នៅតំបន់មជ្ឈិមបូព៌ា ដែលមានកងទ័ពចំនួន ១០.០០០នាក់។