អ្នកនាំពាក្យក្រុមហាម៉ាស លោក Hazem Qassem បានប្រាប់សារព័ត៌មាន AFP កាលពីថ្ងៃសុក្រ (ទី២០ ខែកុម្ភៈ ឆ្នាំ២០២៦) ថា ក្រុមសកម្មប្រយុទ្ធប៉ាឡេស្ទីនមួយនេះ បើកចំហទទួលយកកងកម្លាំងរក្សាសន្តិភាពអន្តរជាតិ នៅតំបន់ហ្កាហ្សា ប៉ុន្តែបដិសេធការជ្រៀតជ្រែកណាមួយ នៅក្នុង «កិច្ចការផ្ទៃក្នុង» របស់ដែនដីនេះ។

នៅឯកិច្ចប្រជុំផ្លូវការលើកដំបូងនៃ «ក្រុមប្រឹក្សាសន្តិភាព» (Board of Peace) របស់ប្រធានាធិបតីអាមេរិក លោក Donald Trump នៅទីក្រុងវ៉ាស៊ីនតោន កាលពីថ្ងៃព្រហស្បតិ៍ មានការប្រកាសថា ប្រទេសមួយចំនួនតូច នឹងប្ដេជ្ញាបញ្ជូនកងទ័ពចូលរួមកងកម្លាំងរក្សាស្ថិរភាពអន្តរជាតិ (ISF) ដែលទើបបង្កើតថ្មី សម្រាប់តំបន់ហ្កាហ្សា។

ប្រទេសម៉ារ៉ុកបានប្រកាសថា ខ្លួនបានត្រៀមរួចជាស្រេចក្នុងការបញ្ជូននគរបាល ក៏ដូចជាទាហាន ទៅចូលរួម ISF ខណៈដែលមេបញ្ជាការអាមេរិកនៃកងកម្លាំងនេះ គឺលោកឧត្តមសេនីយ៍ទោ Jasper Jeffers បានប្រាប់ថា អាល់បានី ឥណ្ឌូនេស៊ី កាហ្សាក់ស្ថាន និងកូសូវ៉ូ ក៏កំពុងបញ្ជូនកងទ័ពចូលរួមផងដែរ។

អ្នកនាំពាក្យក្រុមហាម៉ាស លោក Qassem បានប្រាប់សារព័ត៌មាន AFP ថា «ជំហររបស់យើង ពាក់ព័ន្ធនឹងកងកម្លាំងអន្តរជាតិ គឺច្បាស់លាស់។ យើងចង់បានកងកម្លាំងរក្សាសន្តិភាពដែលត្រួតពិនិត្យបទឈប់បាញ់ ធានាការអនុវត្តកិច្ចព្រមព្រៀងនេះ និងដើរតួជាតំបន់ទ្រនាប់ រវាងកងទ័ពកាន់កាប់ និងប្រជាជនរបស់យើងនៅក្នុងតំបន់ហ្កាហ្សា ដោយមិនជ្រៀតជ្រែកក្នុងកិច្ចការផ្ទៃក្នុងរបស់ដែនដីនេះ»។

ក្រុមប្រឹក្សាសន្តិភាព (Board of Peace) ត្រូវបានបង្កើតឡើង បន្ទាប់ពីរដ្ឋបាលរបស់លោក Trump រួមជាមួយក្រុមប្រទេសសម្របសម្រួលដ៏យូរ គឺកាតា និងអេហ្ស៊ីប បានចរចាឲ្យមានបទឈប់បាញ់ កាលពីខែតុលាឆ្នាំមុន ដើម្បីរំលត់ភ្លើងសង្គ្រាមដ៏បំផ្លិចបំផ្លាញរយៈពេល ២ឆ្នាំ រវាងអ៊ីស្រាអែល និងក្រុមហាម៉ាស នៅតំបន់ហ្កាហ្សា៕