លោកប្រធានាធិបតី Donald Trump បានជំរុញឲ្យសហរដ្ឋអាមេរិកពន្លឿនវិធានការធ្វើសង្គ្រាមជាមួយអ៊ីរ៉ង់ ទោះបីជាជំនួយការផ្ដល់យោបល់ឲ្យលោកផ្តោតបន្ថែមទៀត លើការដោះស្រាយក្ដីបារម្ភផ្នែកសេដ្ឋកិច្ចរបស់អ្នកបោះឆ្នោត ដោយនេះបានបង្ហាញនូវហានិភ័យនយោបាយនៃការកើនឡើងភាពតានតឹងយោធា នៅមុនការបោះឆ្នោតពាក់កណ្តាលអាណត្តិឆ្នាំ២០២៦។

លោក Trump បានបញ្ជាឲ្យបង្កើនកងកម្លាំងយ៉ាងច្រើន នៅតំបន់មជ្ឈិមបូព៌ា និងរៀបចំ សម្រាប់ការវាយប្រហារតាមអាកាសរយៈពេលច្រើនសប្តាហ៍លើអ៊ីរ៉ង់។ ប៉ុន្តែរូបលោកមិនបានបញ្ជាក់លម្អិតនោះឡើយដល់សាធារណជនអាមេរិកថា តើហេតុអ្វីបានជារូបលោកអាចនឹងដឹកនាំសហរដ្ឋអាមេរិកឲ្យធ្វើវិធានការយោធាខ្លាំងក្លាបំផុត ប្រឆាំងនឹងសាធារណរដ្ឋឥស្លាម គិតចាប់តាំងពីបដិវត្តន៍ឆ្នាំ១៩៧០ របស់ប្រទេសនេះ។

ការផ្តោតអារម្មណ៍របស់លោក Trump លើអ៊ីរ៉ង់ បានលេចចេញជាឧទាហរណ៍យ៉ាងច្បាស់លាស់បំផុត រហូតមកទល់ពេលនេះ អំពីរបៀបដែលគោលនយោបាយការបរទេស ក្នុងនោះរួមទាំងការពង្រីកនូវការប្រើប្រាស់កម្លាំងយោធាខ្លាំងក្លារបស់លោកផងដែរ បានឈរនៅលើកំពូលនៃរបៀបវារៈរបស់លោក ក្នុងរយៈពេល ១៣ខែដំបូងនៃអាណត្តិទី២ របស់លោក ដែលជារឿយៗគ្របដណ្ដប់លើបញ្ហាក្នុងស្រុក ដូចជាការចំណាយនៃការរស់នៅ ដោយការស្ទង់មតិសាធារណៈបង្ហាញថា ជាអាទិភាពខ្ពស់ជាងសម្រាប់ជនជាតិអាមេរិកភាគច្រើន។

មន្ត្រីជាន់ខ្ពស់ម្នាក់ពីសេតវិមាន បាននិយាយថា ទោះបីជាលោក Trump មានវោហាសាស្ត្រធ្វើសង្គ្រាមក៏ដោយ ក៏នៅតែមិនមាន «ការគាំទ្ររួមគ្នា» នៅក្នុងរដ្ឋបាល ដើម្បីបន្តវិធានការវាយប្រហារលើអ៊ីរ៉ង់ឡើយ។

បើយោងតាមបុគ្គលម្នាក់ បានឲ្យដឹងថា ទីប្រឹក្សាសេតវិមាន និងមន្ត្រីយុទ្ធនាការរបស់គណបក្សសាធារណរដ្ឋ ចង់ឲ្យលោក Trump ផ្តោតលើសេដ្ឋកិច្ច ជាចំណុចមួយដែលត្រូវបានសង្កត់ធ្ងន់ថា ជាបញ្ហាយុទ្ធនាការធំជាងគេ នៅក្នុងសន្និសីទឯកជនមួយ នាសប្តាហ៍នេះ ជាមួយលេខាធិការគណៈរដ្ឋមន្ត្រីជាច្រើន។ លោក Trump មិនមានវត្តមាននៅក្នុងសន្និសីទនោះទេ។

មន្ត្រីសេតវិមានទី២ ដែលឆ្លើយតបទៅនឹងសំណួររបស់សារព័ត៌មាន Reuters សម្រាប់រឿងនេះ បាននិយាយថា របៀបវារៈគោលនយោបាយការបរទេសរបស់លោក Trump «បានធ្វើឡើង ដើម្បីជាប្រយោជន៍សម្រាប់ប្រជាជនអាមេរិក»។ មន្ត្រីរូបនេះបានបញ្ជាក់ថា «វិធានការទាំងអស់របស់ប្រធានាធិបតី គឺយកសហរដ្ឋអាមេរិកជាអាទិភាព មិនថាតាមរយៈការធ្វើឲ្យពិភពលោកទាំងមូលមានសុវត្ថិភាព ឬធ្វើឲ្យសេដ្ឋកិច្ចក្នុងប្រទេសរបស់យើងប្រសើរឡើងនោះទេ»៕