កាលពីថ្ងៃសុក្រ (ទី២០ ខែកុម្ភៈ ឆ្នាំ២០២៦) លោកប្រធានាធិបតី Volodymyr Zelenskyy បានប្រាប់សារព័ត៌មាន AFP ថា កងទ័ពរបស់លោកទើបតែរំដោះបានទឹកដីជាច្រើន នៅភាគខាងត្បូងនៃប្រទេសអ៊ុយក្រែន ទោះបីជាទីក្រុងវ៉ាស៊ីនតោន និងមូស្គូ ដាក់សម្ពាធលើទីក្រុងគីវឲ្យប្រគល់តំបន់ផ្សេងទៀត ដើម្បីបញ្ចប់សង្គ្រាមក៏ដោយ។

អំឡុងពេលថ្លែងសុន្ទរកថា នៅប៉ុន្មានថ្ងៃមុនខួបលើកទី៤ នៃសង្គ្រាមដ៏ធំនេះ លោក Zelenskyy បានបញ្ជាក់ថា សហរដ្ឋអាមេរិក និងរុស្ស៊ី នៅតែទទូចឲ្យទីក្រុងគីវបោះបងតំបន់ Donbas ដែលកំពុងស្ថិតក្នុងស្ថានភាពលំបាក ជាសេណារីយ៉ូដែលអ៊ុយក្រែនបានច្រានចោលម្តងហើយម្តងទៀត។

ប៉ុន្តែទោះបីជាមានដំណើរការចរចាដឹកនាំដោយសហរដ្ឋអាមេរិក ដែលមានគោលបំណងបញ្ចប់ជម្លោះនេះក៏ដោយ ក៏កងទ័ពរបស់ទីក្រុងគីវវកំពុងវាយដណ្តើមបានដែនដីពីកងកម្លាំងឈ្លានពានរុស្ស៊ី។ នេះបើតាមលោក Zelenskyy ដែលបាននិយាយប្រាប់សារព័ត៌មាន AFP ក្នុងបទសម្ភាសន៍ផ្តាច់មុខមួយ នៅការិយាល័យប្រធានាធិបតី ក្នុងទីក្រុងគីវ។

លោក Zelenskyy បាននិយាយថា៖ «ខ្ញុំនឹងមិននិយាយលម្អិតច្រើនពេកទេ ប៉ុន្តែថ្ងៃនេះ ខ្ញុំអាចអបអរសាទរកងទ័ពរបស់យើងជាមុនសិន ពោលគឺកងកម្លាំងការពារជាតិទាំងអស់ ពីព្រោះគិតត្រឹមថ្ងៃនេះ ទឹកដីទំហំ ៣០០គីឡូម៉ែត្រការ៉េ ត្រូវបានរំដោះ»។

លោក Zelenskyy បានបន្តថា អ៊ុយក្រែន ដែលកំពុងតែជួបប្រទះនឹងកង្វះខាតកម្លាំងមនុស្ស និងធនធានបើប្រៀបធៀបទៅនឹងកងកម្លាំងរុស្ស៊ី នៅតែប្រឈមនឹងសម្ពាធ ដើម្បីឲ្យប្រគល់តំបន់ Donbas ដែលជាតំបន់ឧស្សាហកម្ម និងបន្ទាយដ៏រឹងមាំមួយនៅភាគខាងកើត ដែលរុស្ស៊ីបានអះអាងថា ជារបស់ខ្លួន។ មេដឹកនាំអ៊ុយក្រែន បានប្រាប់សារព័ត៌មាន AFP ថា៖ «ទាំងអាមេរិក និងរុស្ស៊ី លើកឡើងដូចគ្នាថា ប្រសិនបើអ្នកចង់ឲ្យសង្គ្រាមបញ្ចប់នៅថ្ងៃស្អែក ចូរដកចេញពីតំបន់ Donbas»។

តែយ៉ាងណាក្ដី អ៊ុយក្រែនបានច្រានចោលម្តងហើយម្តងទៀត ចំពោះការដកកងទ័ពរបស់ខ្លួនចេញពីតំបន់នេះ ដោយសង្កត់ធ្ងន់ថា ចំណាត់ការបែបនេះនឹងត្រឹមតែធ្វើឲ្យរុស្ស៊ីមានការជឿជាក់ខ្លាំងឡើងៗប៉ុណ្ណោះ៕