យ៉ាងហោចណាស់មនុស្ស ៥០នាក់ ត្រូវបានសម្លាប់ ហើយស្ត្រី និងកុមារជាច្រើននាក់ ត្រូវបានចាប់ពង្រត់បន្ទាប់ពីក្រុមប្រដាប់អាវុធ បានវាយប្រហារភូមិមួយ នៅរដ្ឋ Zamfara ភាគពាយព្យនៃប្រទេសនីហ្សេរីយ៉ា។ នេះបើយោងតាមសមាជិកសភារបស់រដ្ឋនេះ ដែលបានប្រាប់សារព័ត៌មាន កាលពីថ្ងៃសុក្រ (ទី២០ ខែកុម្ភៈ ឆ្នាំ២០២៦)។

លោក Hamisu A. Faru សមាជិកសភាតំណាងឲ្យតំបន់ Bukkuyum ភាគខាងត្បូង បាននិយាយថា ក្រុមអ្នកវាយប្រហារ បានវាយឆ្មក់ភូមិ Tungan Dutse ចាប់ពីម៉ោងប្រហែល ៥ល្ងាចថ្ងៃព្រហស្បតិ៍ រហូតដល់ម៉ោងប្រហែល ៣:៣០ព្រឹកថ្ងៃសុក្រ (ម៉ោងក្នុងស្រុក) ដោយដុតបំផ្លាញអគារ និងបាញ់ប្រហារអ្នកស្រុកដែលព្យាយាមរត់គេចខ្លួន។

លោក Faru បានប្រាប់សារព័ត៌មាន Reuters តាមទូរស័ព្ទថា៖ «ពួកគេបានវាយប្រហារពីភូមិមួយ ទៅភូមិមួយទៀត ដោយបានបណ្តាលឲ្យមនុស្សយ៉ាងហោចណាស់ ៥០នាក់ស្លាប់»។ លោកបានបញ្ជាក់ថា ចំនួនជនរងគ្រោះដែលត្រូវបានចាប់ពង្រត់ មិនទាន់ត្រូវបានកំណត់នៅឡើយទេ។ 

នៅមួយថ្ងៃមុននេះ ប្រជាពលរដ្ឋបានទាក់ទងកងកម្លាំងសន្តិសុខ និងអាជ្ញាធរមូលដ្ឋាន នៅពេលដែលពួកគេបានឃើញម៉ូតូជាង ១៥០គ្រឿង ដឹកបុរសៗប្រដាប់អាវុធ។ តែបើតាមពលរដ្ឋម្នាក់ បានប្រាប់ថា ការផ្ដល់ដំណឹងនេះ មិនត្រូវបានគេអើពើឡើយ។

អសន្តិសុខ គឺជាក្តីបារម្ភយ៉ាងខ្លាំង នៅក្នុងប្រទេសនីហ្សេរីយ៉ា ហើយរដ្ឋាភិបាល កំពុងស្ថិតនៅក្រោមសម្ពាធកាន់តែខ្លាំងឡើង ដើម្បីស្តារស្ថិរភាពឡើងវិញ។ មានការកើនឡើងនូវការវាយប្រហារ ដែលត្រូវបានចោទថា ជាស្នាដៃរបស់ «ក្រុមចោរប្លន់» ដែលបានអនុវត្តការវាយប្រហារបណ្ដាលឲ្យមានមនុស្សស្លាប់ ការចាប់ជំរិត ដើម្បីទាមទារប្រាក់លោះ និងការផ្លាស់ទីលំនៅរបស់សហគមន៍នៅទូទាំងភាគខាងជើងនីហ្សេរីយ៉ា៕