ប្រធានាធិបតីបារាំង លោក Emmanuel Macron នៅថ្ងៃសោរ៍ (ទី២១ ខែកុម្ភៈ ឆ្នាំ២០២៦) នេះ បានប្រាប់ឲ្យដឹងថា សេចក្តីសម្រេចរបស់តុលាការកំពូលអាមេរិក ពាក់ព័ន្ធនឹងពន្ធពាណិជ្ជកម្មរបស់លោកប្រធានាធិបតី Donald Trump បង្ហាញឲ្យឃើញថា វាគឺជាការល្អក្នុងការមានតុល្យភាពអំណាច និងនីតិរដ្ឋ នៅក្នុងប្រទេសប្រជាធិបតេយ្យ។

នៅឯពិធីជួបជុំប្រចាំឆ្នាំ ស្តីពីកសិកម្ម នៅទីក្រុងប៉ារីស ជាការឆ្លើយតបទៅនឹងសំណួរ អំពីសេចក្តីសម្រេចរបស់តុលាការកំពូលអាមេរិក កាលពីថ្ងៃទី២០ ខែកុម្ភៈ ដែលថា ការដំឡើងពន្ធដាក់ដោយលោក Trump ក្រោមច្បាប់គ្រាអាសន្នសេដ្ឋកិច្ច គឺខុសច្បាប់នោះ លោក Macron បាននិយាយថា៖ «វាមិនមែនជារឿងអាក្រក់នោះទេ ក្នុងការមានតុលាការកំពូល ហើយបន្ទាប់មក គឺនីតិរដ្ឋ»។

លោក Macron បានសង្កត់ធ្ងន់ថា៖ «វាគឺជាការល្អក្នុងការមានសិទ្ធិអំណាច និងតុល្យភាពអំណាច នៅក្នុងប្រទេសប្រជាធិបតេយ្យ»។

ជាមួយគ្នានេះ លោកបានបន្ថែមថា បារាំងនឹងពិចារណាលើផលវិបាកនៃពន្ធសកលថ្មី ១០ភាគរយរបស់លោក Trump និងសម្របខ្លួន ហើយប្រទេសនេះចង់បន្តនាំចេញផលិតផលរបស់ខ្លួន ក្នុងនោះរួមទាំងផលិតផលកសិកម្ម វត្ថុប្រណិតៗ ផ្នែកម៉ូដ និងទំនិញអាកាសចរណ៍។

មេដឹកនាំបារាំងបានលើកឡើងថា ចិត្តគំនិតស្ងប់ស្ងាត់ គឺត្រូវការជាចាំបាច់ ហើយវិធីសាស្ត្រដ៏យុត្តិធម៌បំផុត គឺ «ការផ្ដល់ផលឲ្យគ្នាទៅវិញមក» និងមិនត្រូវ «រងគ្រោះ ដោយសារការសម្រេចចិត្តឯកតោភាគី» នោះឡើយ៕